Компанијата „Спејс екс“ неодамна објави дека ќе го лансира вселенското летало „Старшип“ и ќе го изврши својот прв орбитален тест-лет по неодамнешното тестирање и добивањето регулаторно одобрение, на кое сè уште се чека, а сега извршниот директор на компанијата Илон Маск најави дека тоа би можело да се случи на крајот на третата недела од април.
„Старшип“ е долгоочекуваното водечко вселенско летало на „Спејс екс“, кое е дизајнирано да транспортира астронаути и товар во длабоката вселена, вклучувајќи ги Месечината и Марс. Деловите од системот се дизајнирани да се користат повеќепати, а „Старшип“ е поврзан со масивната ракета „Суперхеви“, која ќе се лансира од површината на Земјата.
„Спејс екс“ целосно го подготви „Старшип“ за тестирање во Старбејз лоциран во Бока Чика, Тексас. Претходно имаше одложувања поради различни причини, една од нив беше процената на Федералната управа за авијација (ФАА), која утврди дека ќе има влијание врз животната средина на околината на базата. Затоа, дозволата не е издадена.
Новиот датум за лансирање на „Старшип“ е 17 април, а прозорецот ќе биде отворен до 22 април. „Спејс екс“ соработува со ФАА и се очекува конечно ова регулаторно тело да издаде дозвола.
Ако тоа се случи на 17 април, тоа ќе значи дека „Спејс екс“ ќе биде на само неколку дена од последното лансирање. Откако ќе заврши лансирањето, „Суперхеви“ и „Старшип“ ќе се разделат, по што „Суперхеви“ ќе се врати во Мексиканскиот Залив, а „Старшип“ ќе го продолжи своето патување во орбитата. Набргу потоа „Старшип“ повторно ќе влезе во атмосферата на Земјата и ќе изврши вертикално слетување во Тихи Океан во близината на Хаваи.
