Националниот ден на коктелот „маргарита“ во САД се одбележи во сенка на предупредувањата на научниците дека климатските промени му се закануваат на главниот опрашувач на растението агаве, без кој нема вистинска текила, главната состојка на коктелот „маргарита“.
Според податоците на Американското здружение на дестилатори, минатата година текилата и мескалот биле економски најбрзо растечка категорија на жестоки пијалаци, пренесува „Си-ен-ен“.
Научниците од целиот свет предвидоа дека недостигот од вода предизвикан од климатските промени ќе продолжи да врши огромен притисок врз производителите на храна во иднина, а виното и алкохолните пијалаци, за жал, не се изземени од оваа прогноза.
Студијата од 2019 година покажа дека климатската криза, сточарството и прекумерното пасење и другите економски активности може да ги нарушат одгледувањето и дистрибуцијата на агаве, главната состојка во текилата.
Иако растението е толерантно на суша и успева на топло време со малку или без вода, Оманџана Госвами, научник за храна и животна средина во Унијата на загрижени научници, вели дека животниот циклус на агавето е премногу кревок за да издржи големи временски промени.
– За жал, климатските ефекти не се линеарни. Екстремните временски услови во комбинација со непредвидливоста го отежнуваат предвидувањето во која насока ќе се движи одгледувањето на агавето во иднина – додаде Госвами.
Националниот ден на коктелот „маргарита“ беше прогласен во 1971 година од страна на американскиот претседател Ричард Никсон за да му оддаде почит на омилениот коктел на Американците.
Коктелот „маргарита“, создаден во 1938 година во Мексико, е направен од текила и сок од лимета и се смета за омилен пијалак за забава во Америка.
