Во првите десетина минути од почетокот на судењето, одбраната на поранешниот генерален секретар Драги Рашковски, побара да се одложи рочиштето. Исто барање упати и адвокатката Сузана Јошевска Анастасовска, бранител на друг Ивица Димитровски. Бидејќи Ивана Трајчева е со истечен мандат, а Обвинителството за гонење организиран криминал и корупција нема доволно обвинители, на рочиштето како застапник на обвинението дојде шефицата Вилма Русковска.
– Мислам дека не се исполнети условите да се одржи главна расправа, бидејќи од исходот по одлуката за издвојување на докази, зависи теоријата на случај на одбраната, но и на јавното обвинителство. Тоа е секако релевантно, за самиот почеток, како давањето на воведниот збор – рече адвокатот на Рашковски.
На ваквото барање за трето по ред одлагање се придружи и адвокатката Јошевска Анастасовска.
– За ова треба правосилна одлука за да пристапиме кон воведни говори кои треба да ја одбележат траекторијата на одбраната, како и самото обвинение – рече таа.
Но судот, ваквите барања ги одби.
– Советот го имаше во предвид тој момент дека предметот беше на Апелација. Меѓутоа, го побара предметот со комплет списи да биде вратен бидејќи тоа не е пречка за постапување. Во секоја фаза од постапката можат да бидат издвоени докази. Нема ограничување во законот. Во моментот се носи одлука за одбивање на предлогот како неоснован. Предлогот не се прифаќа за одлагање – рече судијката Фанка Јанчулева-Михаиловска.
