Владата од денеска интервентно ќе обезбедува по 50.000 литри бесплатна вода за пиење дневно за граѓаните на Гостивар, сè додека траат мерките и препораките на надлежните институции поради забраната за користење на водата од градскиот водовод.
Од Владата информираат дека од првиот момент се во постојана координација со сите надлежни институции и внимателно ја следат состојбата со водоснабдувањето во градот.
Дистрибуцијата на водата ќе ја организира Службата за општи и заеднички работи на Владата преку седум пунктови во Гостивар:
- Водостопанство – Гостивар (ул. ЈНА бр. 139)
- Градинка „Пролет“ (ул. Беличица бр. 47)
- Средното економско училиште во Гостивар (ул. Живко Брајковски бр. 39)
- ЈП „Национални шуми“ – Подружница „Шар“ (ул. Браќа Ѓиноски бр. 165)
- АД ЕСМ – Подружница кај гаражите (питарница), ул. Илинденска
- Општата болница „Ферид Мурад“ (паркинг, ул. Чеде Филиповски бр. 29)
- Територијалната противпожарна единица (ул. Беличица бр. 35)
Од Владата нагласуваат дека паралелно продолжуваат сите контроли, лабораториски анализи и истражни дејствија за утврдување на причините за загадувањето на водата.
– Очекуваме целосно расчистување на случајот, а секој кај кого ќе биде утврдена одговорност ќе одговара согласно закон – порачуваат од Владата.
Воедно, апелираат граѓаните да ги почитуваат препораките на здравствените власти и информациите да ги следат исклучиво преку официјалните канали.
Како што посочуваат, заштитата на здравјето на граѓаните останува врвен приоритет, а Владата ќе продолжи да обезбедува поддршка сè до целосно нормализирање на состојбата.
