Патниците кои ја преживеаа тешката несреќа во која синоќа се судрија два воза во близина на грчкиот град Лариса изјавија дека слушнале силен удар, а потоа вагоните почнале да се превртуваат.
Како што рекоа, околу нив имало пламени јазици од сите страни, а некои се спасиле скокајќи од вагонот од голема височина.
– Слушнавме силен тресок. Следните 10 секунди беа пекол. Се тркалавме низ вагонот додека не застана и потоа паднавме. Настана паника. Веднаш изби пожар. Беше секаде околу нас, изјави за Ројтерс Стергиос Миненис, кој ја преживеа несреќата.
Друг патник вели дека првите 10 до 15 секунди по несреќата биле хорор. И ја наведува истата ужасна ситуација – превртување, пожар, закачени кабли, скршени прозорци, заробени луѓе кои врескаат.
Ангелос Цијамурас за медиумите изјави дека судирот се чувствувал како земјотрес.
– Тоа беше многу силен судир. Ова беше ужасна ноќ. Тешко е да се опише местото на несреќата – изјави Цијамурас
Снимките направени веднаш по судирот покажуваат густ чад кој излегува од превртените вагони. Најмалку еден беше целосно смачкан.
На местото на настанот излегле околу 150 пожарникари и 40 екипи за итна помош, соопшти противпожарната служба, а пренесува Би-би-си. Спасувачите објавија дека поради сериозноста на судирот условите за спасување биле многу тешки.
– Никогаш во животот не сум видел вакво нешто. Ова е трагедија. Пет часа по судирот, сè уште наоѓаме тела – изјави за „АФП“ исцрпен спасувач кој излегол од урнатините на возот.
Волонтерот кој дошол да им помогне на спасувачите рекол дека сите ќе останат на местото на трагедијата додека не го најдат последниот човек во возот.
Според последните податоци, најмалку 32 лица загинаа, а 85 се повредени. Возот сообраќал на линијата Атина-Солун, а причината за несреќата засега не е позната.
