Ирак потпиша 48 договори, меморандуми за разбирање, декларации за партнерство и други документи со американски компании за време на официјалната посета на премиерот Али ал-Заиди на Соединетите Американски Држави, соопшти неговиот кабинет.
Најголемиот дел од договорите се однесуваат на енергетскиот сектор, а меѓу нив се партнерства меѓу ирачките министерства за електрична енергија и нафта и американските компании „ЕксонМобил“, „КБР“, „ГЕ Вернова“, „Шел“ и „Халибартон“.
Дополнително, Ирак склучи договор со компанијата „Старлинк“ за развој на сателитски интернет услуги, како и договор за обновување на нафтоводот меѓу Ирак и Сирија. Проектот, кој претходно беше најавен од американските власти, има за цел да обезбеди нова стратешка рута за транспорт на сурова нафта во услови на зголемени тензии меѓу САД и Иран.
За време на посетата, американскиот претседател Доналд Трамп изјави дека имал „одлична хемија“ со ирачкиот премиер, кого го опиша како „шампион“.
Посетата претставува прво официјално патување на Али ал-Заиди во странство откако ја презеде функцијата во април.
Ирак, чија економија во голема мера зависи од извозот на нафта, настојува да го забрза економското закрепнување. Земјата се соочува со последиците од конфликтите на Блискиот Исток и нарушувањата во транспортот преку Ормуската Теснина, како и со внатрешни предизвици како модернизација на инфраструктурата, подобрување на јавните услуги и намалување на корупцијата.
