Лекарите денеска ја користат паузата за да протестираат, барајќи да биде потпишан Колективен договор за израмнување на платите според последната корекција на минималната плата од минатата година, како и за неисплатениот регрес. Здравствените работници бараат зголемување на платите и исплата без доцнење, како што беше случај со јануарската плата. Беше предвидено протестот на здравствените работници низ Македонија да трае половина час, од 10 до 10.30 часот.
– Согласно со европското законодавство, овој упад со нацрт законот за плати, во колективните договори, може да значи укинување или намалување, на правата работниците пропишани на согласно овие колективни договори. За година од првичното покачување на минималната плата и доближувањето на другите пониски профили кон профилот на медицински сестри, се направи збрка во коефициентите. Со најавата за ново зголемување на минималната плата во март, уште повеќе ќе ги доближи другите профили до профилот медицинска сестра – изјави Гордана Димеска од Синдикатот на Клинички центар.
Еден искусен технички персонал со подолг стаж, укажа таа, ќе зема поголема плата од медицинска сестра. Да не бидам погрешно разбрана. Дефицитот не е само во здравствените работници туку и во другите профили.
Таа информираше дека е голем одливот на медицински сестри и како што рече, пет до шест илјади ја напуштиле земјава последниве три до пет години.
Согласно податоците од Комората на лекари, како што беше нагласено на протестот пред Клиничкиот центар, 2.200 лекари во последните три години ја напуштиле државата.
Русе Пецаноски од овој синдикат истакна дека протестот е израз на незадоволство поради тоа што за три години, платите биле покачени само пет проценти. Негодување, како што рече, имало и поради пензионирања на околу 180 врвни стручни лица кои немале право да продолжат со работа.
Пораки за зголемување на платите беа упатени и на протестот пред ГОБ „8 Септември”.
– Да го изразиме незадоволството поради доцнењето на платата, бидејќи доцнеше платата. Продолжуваме со притисокот, незадоволни што се уште не е потпишан анексот за покачување на платите во здравствената дејност. Тоа е основата на протестот, да го свртиме вниманието на надлежните – информираше Љубиша Каранфиловски, претседател на Самостојниот синдикат за здравство, фармација и социјална заштита на Македонија.
Синдикатот на Клинички центар од Владата побара состанок на кој би се договориле кои би биле следните чекори и како би се реализирале покачувањата, со оглед на најавеното зголемувањето на минималната плата од март.
