Според неодамнешниот извештај на компанијата за интернет-перформанси и безбедност „Клаудфлер“, Тикток го победи Гугл во однос на интернет-сообраќајот и стана најпосетуваната платформа на пазарот во 2021 година. Во својот официјален извештај за онлајн сообраќајот во претходната година, „Клаудфлер“ ги наведе првите 10 најпопуларни домени или интернет-страници во 2021 година.
Додека Гугл, заедно со своите други платформи како Мепс, Фотос, Транслејт и Букс, остана непоразен лидер во 2020 година, Тикток се искачи од седмото место на врвот за да го победи гигантот Маунтин вју.
На листата на топ 10 се: Тикток, Гугл, Фејсбук, Мајкрософт, Епл, Амазон, Нетфликс, Јутјуб, Твитер и Воцап.
Според извештајот, Тикток првпат го достигна врвот на глобалното рангирање на сообраќајот на 17 февруари оваа година. Имаше уште еден пораст на сообраќајот на платформата, во март и јуни. Потоа, кратката видеоплатформа го зазеде своето место како број еден. И покрај тоа што беше трајно забранет во Индија и се соочи со негативни реакции во САД, Тикток го надмина Фејсбук и стана најсимнуваната апликација во светот оваа година.
Понатаму, според неодамнешниот извештај на „Њујорк тајмс“, платформата за кратки видеа стана „свет грал на маркетингот“ за огласувачите што целат на популацијата на генерацијата З, познати како зумери. Разновидноста на содржината привлече корисници од сите сектори, заедници и возрасни групи и помогна платформата да стане број еден.
