Неодамна од печат излезе новиот роман „Времето пред приказната“ од неповторливиот книжевен мајстор Митко Маџунков. Романот е во издание на издавачкиот центар „Три“ и оттаму велат дека со појавувањето на овој наслов се збогати не само личниот опус на авторот туку и целокупната македонска литература.
– Уникатни се авторите што создаваат безвременски дела, како што тоа несомнено му успева на Маџунков. Сето наследство што несебично ни го оставаат го втиснуваат во идентитетот на македонскиот човек, кој по читањето на книгите каква што е „Времето пред приказната“ повеќе не е (и не треба да биде) ист. Зашто таквите романи имаат моќ да поттикнат на промислување и на промена – велат од „Три“.
Редок и неповторлив книжевен мајстор е Митко Маџунков, еден од македонските автори што непоколебливо го одржуваат квалитетот на домашната книжевност. „Времето пред приказната“, неговиот последен роман, е редок пример на една раскошна епска сага, која всушност е слика на нашето време, на нашето непосредно минато, на нашата сегашност и најблиска иднина. Времето кај Митко Маџунков не се мери со часовник, а историјата е собрана на едно место – искористена за да се создаде нова што ќе се темели врз критиките на големите светски мислители. Проникнат со мисловна и јазична густина, најновиот роман на Маџунков е полифонична приказна во која секоја реченица крие повеќе значења и се разгранува во повеќе можни текови.
За своето творештво Маџунков е добитник на повеќе книжевни награди и признанија: „Исидора Секулиќ“, Рациново признание, „Војдан Чернодрински“, Роман на годината на „Детска радост“, Книга на годината на Македонската книжевна фондација, двапати ја добил Годишната награда на својот роден град Струмица, а оваа година токму со „Времето пред приказната“ е во изборот за престижната награда Роман на годината за 2022 година.
