Во новата железничка станица, објект што е еден од најпрепознатливите симболи на изградбата на Скопје, се одржа настанот „Борко Лазески – уметност достапна за сите“, на кој беа презентирани дигитализирани проекции на скиците од фрагменти од неговата „Фреска за НОБ“, важен дел од меморијата на старо Скопје. Во пресрет на 60-годишнината од трагедијата за градот, претседателот на државата, Стево Пендаровски, и семејството на Борко Лазески ја промовираа иницијативата за возобновување на монументалното дело на Борко Лазески, „Фреската за НОБ“ “, која до земјотресот во 1963 г. била дел од холот на старата железничка станица во Скопје.
Министерката за култура Бисера Костадиновска-Стојчевска на настанот истакна дека Лазески сам по себе е монументална фигура за современата македонска уметност, кој успеал да обедини различни уметнички традиции – традицијата на македонскиот фрескоживопис, влијанијата на светската монументалистичка традиција, уметноста на Вилјам Блејк или од мексиканските муралисти. Таа додаде дека Министерството за култура, преку надлежните институции, прави напори за да се зачува творештвото на Борко Лазески.
– Борко Лазески преферирал јавни простори за изложување на своите дела за да може да биде во комуникација со граѓаните, нешто што е вградено и во нашите културни политики – со кои сакаме културата да допре до сите граѓани и краишта на земјата. Министерството за култура е должно да ги поддржува сите автори што работат на постигнување на оваа мисија. Како и досега така и во иднина остануваме партнер и пријател на македонските уметници бидејќи нивните креации, освен што го толкуваат светот во кој живееме, се и наш начин за комуникација со остатокот од светот – рече Костадиновска-Стојчевска.
