Јужна Африка, која се приклучи на првичната четиричлена група (Бразил, Русија, Индија и Кина и беше наречена БРИК во 2010 година), сега е рамноправен петти член на блокот наречен БРИКС. Во Преторија, Јужна Африка, домаќинот Сирил Рамафоса ги пречека кинескиот претседател Си Џинпинг, неговиот бразилски колега Лула да Силва и индискиот премиер Нарендра Моди. Рускиот претседател Владимир Путин е застапуван од министерот за надворешни работи Сергеј Лавров.
Високо на агендата на самитот на БРИКС е проширувањето на блокот.
На самитот присуствуваат дури 69 земји, а 23 земји, меѓу кои Индонезија, Саудиска Арабија и Иран, официјално побараа да му се приклучат на блокот земји БРИКС. На дневниот ред на самитот е собирањето средства во локална валута, како и кредитирањето и што поголемата независност на блокот БРИКС од американскиот долар како платежно средство во платниот промет во меѓународната трговија.
Новата развојна банка (НРБ, основана од блокот БРИКС во 2015 година) им даде заеми од 33 милијарди американски долари на своите пет земји-членки, од кои две третини беа во долари. Новата развојна банка (НРБ) со седиште во Шангај има цел да го зголеми кредитирањето во локална валута од 22 на 30 отсто до 2026 година. Банката има интенција да се прошири. На пример, во 2021 година кон неа се приклучија Бангладеш, Египет и Обединетите Арапски Емирати (ОАЕ), со што нејзиното членство достигна осум земји.
Самитот на БРИКС во Јужна Африка ќе биде платформа за разговори со потенцијалните нови членки.
