Настанот пред германскиот парламент, реакциите на политичките претставници и информацијата на Службата за заштита на уставниот поредок ( БФВ) повторно го актуелизираа прашањето за политичкиот екстремизам и антисемитизмот во Берлин
Доне Прентоски, постојан соработник на Нова Македонија од Германија
Пред зградата на Рајхстагот во Берлин, вчера се случи инцидент во кој 22-годишен маж се искачи на јарболот на плоштадот Републик, ја отстрани таканаречената „Знаме на германското единство“ и на нејзино место постави палестинско знаме.
Според информациите на берлинската полиција, двајца други мажи, на возраст од 20 и 32 години, биле присутни во подножјето на јарболот и ја поддржувале акцијата. Настанот бил и сниман и пренесуван преку социјалните мрежи.
Групата „Пеацефуллy Агаинст Геноциде“ ја презеде одговорноста за акцијата, наведувајќи дека станува збор за граѓанска солидарност со палестинското население.
Реакција од претседателката на Бундестагот
По инцидентот реагираше претседателката на германскиот Бундестаг, Јулија Клекнер, која побара подобра заштита на парламентот.
– Нашиот германски Бундестаг има потреба од поголема заштита – порача Клекнер.
Таа нагласи дека парламентот не треба да се претвора во сцена за политички акции и дека безбедноста треба да го опфаќа и непосредното опкружување на зградата.
Постапување на полицијата и истрага на Државната безбедност
Портпаролот на берлинската полиција, Мартин Халвег, за германскиот весник „Тагесшпигел“ потврди детали за текот на акцијата.
Според полициските информации, 22-годишниот маж по околу еден час самостојно се симнал од јарболот, по што палестинското знаме било отстрането со помош на противпожарната служба.
Против учесниците се води истрага поради сомнение за оцрнување на државата и нејзините симболи, оштетување на јавен имот, нарушување на домашниот ред и можен прекршок на берлинскиот закон за слобода на собирање.
Истрагата ја презеде Државната безбедност при Покраинската криминалистичка служба (ЛКА).
Полицијата соопшти дека против 22-годишниот маж се разгледувала и мерка притвор за спречување повторување на дејствието. Двајцата други мажи биле ослободени по утврдувањето на нивниот идентитет и изрекувањето забрана за престој на местото.
Важно е да се нагласи дека станува збор за истрага и основани сомневања, а сеуште не за правосилно утврдена вина.
Предупредувања за антисемитизмот
Настанот повторно ја отвори и пошироката дебата за антисемитизмот во Германија, особено во контекст на одредени радикални и пропалестински групи.
Претставници на еврејските организации во Германија во повеќе наврати предупредувале на појави на антисемитизам и на ширење антиизраелски ставови во делови од политичкиот и општествениот простор.
Меѓутоа, важно е да се прави разлика меѓу мирната поддршка за палестинското население и екстремистичките активности. Палестинското знаме само по себе не претставува доказ за екстремизам.
Што покажуваат податоците на Верфасунгшуц?
Според извештајот на Берлинската служба за заштита на уставниот поредок за 2025 година, проценетиот број на лица на лево-екстремистичката сцена во Берлин изнесувал 3.950, додека десно-екстремистичката сцена броела 1.480 лица.
Извештајот посочува и на зголемување на насилните активности на дел од крајно лево- екстремистичка сцена, вклучително и подметнување пожари и напади врз јавна инфраструктура.
Посебно внимание е посветено и на екстремистички групи кои шират антисемитска пропаганда, го негираат правото на постоење на Израел или го релативизираат теророт на Хамас.
Службата, сепак, ги анализира овие појави како различни области на екстремизам и не ги изедначува сите пропалестински активисти со екстремистички групи.
Прашањето за еднакви стандарди
Инцидентот пред Рајхстагот повторно го отвори прашањето дали германските институции и политичките партии со еднаква сериозност ги третираат сите форми на екстремизам.
Во јавната дебата во Германија особено внимание се посветува на десниот екстремизам и на партијата Алтернатива за Германија (АфД). Истовремено, се поставува прашањето за начинот на кој се третираат екстремистичките групи и антисемитските појави во нивното опкружување.
Различните политички движења не можат автоматски да се изедначуваат. Но, демократските принципи и законите треба да важат за сите, без оглед на политичката ориентација.
Случајот пред Бундестагот затоа не е само прашање на едно заменето знаме. Тој отвора поширока дебата за безбедноста на демократските институции, слободата на протест, политичкиот екстремизам и заштитата на еврејската заедница во Германија.
Прашањето што останува отворено е дали германските политички институции ќе успеат доследно да се справат со сите форми на екстремизам, без политички двојни стандарди.
