На завршната вечер на театарскиот фестивал „Театарска пролет“ во Шабац, Србија, свечено беше прогласен апсолутниот победник на фестивалот, претставата „Ана Каренина“, според романот на Толстој, во режија на македонскиот режисер Дејан Пројковски, а во продукција на Новосадско народно позориште – Нови Сад. Претставата на нашиот Пројковски, еден од најнаградуваните и најпродуктивни македонски театарски режисери на Балканот, ги доби наградите за најдобра претстава во целина, за најдобра режија – Дејан Пројковски, за најдобар актер – Арпад Месарош, за најдобра актерка – Тимеа Филеп.
„Ана Каренина“, која настапуваше во конкуренција со претставите, меѓу другите и на Српско народно позориште – Нови Сад, Ателје 212 – Белград и Београдско народно позориште – Белград, ја оценуваше релевантно жири, во состав Зијах Соколовиќ, Слаѓана Килибарда и Ирфан Менсур.
Наградите на „Театарска пролет“ се последни во низата од 22-те награди што овој врвен театарски продукт на Пројковски ги доби во последните две години (премиерно е изведен во ноември 2019 година) во Србија и во странство. Имено, „Ана Каренина“ ги понесе наградите на сите релевантни фестивали во Србија во изминатите две години, како што се фестивалот на професионални театри на Војводина, фестивалот „Тврѓава“, на фестивалот „Борини театарски денови“ во Врање… Актерката Марта Береш, пак, за улогата на Ана Каренина е прогласена и за најдобра актерка во Унгарија.
Со овие награди, „Ана Каренина“ е најнаградуваната претстава во историјата на Новосадско народно позориште – Нови Сад, а истовремено го вбројува македонскиот режисер Дејан Пројковски во редот на најзначајните театарски режисери на денешнината, не само во Македонија туку во целиот регион.
