Оваа година се одбележуваат 105 години од основањето на Комунистичката партија на Кина (КПК). Во текот на изминатите 105 години, КПК остана доследна на својата мисија да обезбеди благосостојба за кинескиот народ и национална преродба на кинеската нација, водејќи ја земјата низ историскиот пат од „застанување на нозе“, преку „просперитет“, до денешната фаза на „зајакнување“. Истовремено, партијата е посветена на унапредување на човечкиот прогрес и промовирање на заеднички просперитет во светот, придонесувајќи со кинеска мудрост, решенија и сила во справувањето со глобалните предизвици.
Осврнувајќи се на своето извонредно патување, КПК од партија со нешто повеќе од 50 членови прерасна во најголемата владејачка политичка партија во светот, со повеќе од 100 милиони членови и искрена поддршка од кинескиот народ. Таа претставува јадро на раководството на социјализмот со кинески карактеристики и има значително глобално влијание. Под водството на КПК, Кина постигна две познати „чуда“ – брз економски раст и долгорочна општествена стабилност – додека нејзиното меѓународно влијание, иновативен капацитет и културна привлечност постојано се зголемуваат.
Клучот за успехот на Кина лежи во партијата. За да се разбере приказната за Кина, најнапред мора да се разбере КПК.
КПК е партија која народот го става на прво место. Таа се придржува кон филозофија за развој ориентиран кон луѓето, вградувајќи ја во својот Статут определбата за целосно служење на народот. Кога беше основана Народна Република Кина, стотици милиони луѓе живееја во сиромаштија. КПК водеше долготрајна и неуморна борба против сиромаштијата, благодарение на која повеќе од 770 милиони жители од руралните средини излегоа од сиромаштија, што претставува најголем придонес кон глобалното намалување на сиромаштијата. Со фокус на благосостојбата на граѓаните, Кина ги изгради најголемите системи за образование, социјална заштита и здравствена грижа во светот. Поддржувајќи го целокупниот процес на народна демократија, КПК обезбедува да биде слушнат гласот на народот, а неговата волја да биде преточена во политиките – од секојдневните животни прашања до најзначајните реформи. Така, при подготовката на 15. петгодишен план беа собрани повеќе од три милиони предлози од јавноста, од кои над 1.500 беа вклучени во конечниот нацрт. Истражување на Универзитетот Харвард, спроведувано повеќе од една деценија, покажува дека повеќе од 90 проценти од кинеските граѓани се задоволни од работата на централната влада.
КПК е партија која се движи во тек со иновациите. Таа ги приспособува основните принципи на марксизмот кон кинеската реалност и богатото традиционално наследство на земјата, постојано применувајќи нови теории во новата практика. Во процесот на кинеската модернизација, КПК го побива митот дека „модернизацијата значи западнизација“ и создава нов модел за човечки развој. Сметајќи ги иновациите за главен двигател на развојот, таа ги поттикнува новите квалитетни производствени сили и промовира висококвалитетен економски раст. За време на 14. петгодишен план, годишните инвестиции во истражувањето и развојот растеа во просек за 10 проценти. Кина ја изгради најголемата 5Г мрежа, најголемиот систем на брзи железници и најголемиот индустриски синџир за нови извори на енергија во светот, а истовремено оствари и значајни достигнувања во квантната технологија, основниот софтвер, напредните материјали, животните науки, биопроизводството и вселенските истражувања. КПК ја предводи трансформацијата на Кина од „произведено во Кина“ во „креирано во Кина“.
КПК е партија посветена на самореформа. Со јасна свест за предизвиците што ги носи управувањето со толку голема партија, таа континуирано спроведува самореформа со цел да го избегне историскиот циклус каде партиите кои се на власт доживуваат подеми и падови. По 18. Национален конгрес на КПК, Централниот комитет на КПК, на чело со другарот Си Џинпинг, го постави целосното и строго самоуправување на партијата за стратешки приоритет во рамките на Сеопфатната стратегија во четири точки, започнувајќи со донесувањето и спроведувањето на Регулативата во осум точки. Постигнат е историски напредок во зајакнувањето на партиската дисциплина. По повод 105-годишнината од своето основање, КПК дополнително ја разви Мислата на Си Џинпинг за градење на партијата, нагласувајќи управување засновано на институциите и правилата, како и интегриран пристап што обезбедува функционерите да не се осмелуваат, да немаат можност и да немаат мотив да се впуштат во корупција. Истражување на Националното биро за статистика покажува дека 94,9 проценти од испитаниците ги потврдуваат резултатите од целосното и строго самоуправување на партијата и имплементацијата на Регулативата во осум точки.
КПК е партија со глобална визија. „Само во подобар свет, Кина може да напредува, и само со просперитетна Кина, светот може да биде подобар.“ Водена од ова убедување, КПК ги застапува Петте принципи на мирен соживот, ја промовира идејата за заедница со заедничка иднина за човештвото, ја поддржува иницијативата „Појас и пат“ и четирите глобални иницијативи, ги афирмира мирот, развојот, соработката и взаемната бенефит и ги промовира заедничките вредности на човештвото со цел да се изгради најширок можен консензус. Концептот за заедница со заедничка иднина за човештвото добива сè поголема меѓународна поддршка, со повеќе од 100 држави и меѓународни организации кои го поддржуваат, а над 40 од нив веќе учествуваат во изградбата на такви заедници на билатерално ниво. Иницијативата „Појас и пат“ прерасна во најголемата и најсеопфатна платформа за меѓународна соработка во светот. Четирите глобални иницијативи нудат јасна насока и практични решенија за надминување на недостатоците во мирот, развојот, безбедноста и управувањето, внесувајќи стабилност во еден неизвесен свет.
Кина и земјите од Централна и Источна Европа ги поврзуваат длабоки историски врски, комплементарни предности, силен интерес за соработка и заедничка аспирација за ревитализација. Изградбата на заедница со заедничка иднина за човештвото невозможно е да се замисли без учеството на земјите од Централна и Источна Европа. Како важна транзитна земја што ги поврзува Западен Балкан и Евроазија, и како значаен член на механизмот за соработка меѓу Кина и земјите од Централна и Источна Европа, Северна Македонија и Кина негуваат традиционално пријателство со долга историја. КПК и кинеската влада придаваат големо значење на овие односи, цврсто ги поддржуваат меѓусебните клучни интереси и најважните прашања и подготвени се да ги споделат можностите што ги создава кинеската модернизација со Северна Македонија. Ќе продолжиме да ја продлабочуваме практичната соработка, да ја унапредуваме меѓучовечката размена, целосно да ги искористиме можностите што ги нуди платформата Кина – земји од Централна и Источна Европа, и заедно со Северна Македонија да ги поттикнуваме нашиот развој и ревитализација, чекорејќи рака под рака кон посветла иднина.
Џијанг Сјаојан, Aмбасадорка на Народна Република Кина во Македонија
