Во детската градинка „Мајски цвет“ во Тафталиџе 2, денеска се отвори „Градина од сказните“.
Како што информираат од општина Карпош, најмладите, заедно со нивните наставници го уредиле дворoт на градинката и ја разубавиле околината, правејќи креативни катчиња изработени од еко-материјали.
Пред присутните се обрати градоначалникот на Карпош, Стефан Богоев, кој ја поздрави иницијативата за разубавување на дворот и подигнување на свеста за заштита на природата кај најмладите.
– Целта на предучилишното образование е да ја даде основата, да научите да творите, а потоа на училиште да се надградувате и да растете со нови знаења и искуства. Сепак, горд сум што во Карпош има деца, воспитувачи/негувателки и родители кои сакаат да избегаат од секојдневното, тековното и да бидат креативни – изјави Богоев.
Тој, исто така, додаде дека ваквите иницијативи го покажуваат лицето на европски Карпош.
Свое обраќање имаше и директорката на градинката, Ангела Ангеловска, која говореше за процесот на создавање на градината и ја потенцираше успешната соработка меѓу сите страни.
