ЦЕНТРАЛНИОТ СОВЕТ НА МАКЕДОНЦИТЕ ВО ГЕРМАНИЈА СО БАРАЊЕ ДО МАКЕДОНСКАТА ВЛАДА:
Одборот на Централниот совет на Македонците во Германија на вонреден состанок едногласно одлучи да побара итно враќање на човековите права за македонските граѓани и да поведе правна постапка.
Од 13 февруари 2024 година, македонската влада не ги почитува основните права на Македонците низ светот. Особено, одлуката да се прогласат важечки пасоши за неважечки без доволен капацитет за издавање нови пасоши доведе до огромни проблеми. Над стотици илјади засегнати граѓани се погодени со оваа мерка, некои од нив добија термини за обновување на пасошот дури за октомври 2024 година.
Во писмото упатено до претседателката Фон дер Лајен, Европската комисија, канцеларот Шолц, Сојузна Република Германија, и до премиерот Џафери, Македонија, Централниот совет на Македонците во Германија повикува на итни мерки за ставање крај на овие прекршувања на човековите права.
Во писмото се поставува краен рок до 23 февруари 2024 година, во кој се повикува македонската влада да го повлече своето решение за поништување на важечките пасоши и да се погрижи за брзо и ефикасно издавање важечки пасоши. Доколку овој рок помине неискористен, Централниот совет на Македонците во Германија го задржува правото да преземе правни активности за спроведување на правата на засегнатите граѓани на суд.
Претседателот на Централниот совет, Роберт Кленкоски, ја истакна итноста на ситуацијата и апелираше до сите инволвирани влади веднаш да дејствуваат: „Не смее да се толерира прекршувањето на правата на граѓаните, ниту во ЕУ, ниту во Македонија. Од најголема важност е македонската влада сериозно да ја сфати оваа итна работа и веднаш да дејствува за да ги врати човековите права на нашите граѓани“.
Централниот совет на Македонците во Германија очекува Европската комисија, Федералната влада и македонската влада брзо и конструктивно да одговорат на неговите барања за заштита и гарантирање на основните човекови права на македонските граѓани.
Целосните писма до претседателката Фон дер Лајен, канцеларот Шолц и премиерот Џафери се достапни за преземање на веб-страницата на Централниот совет на Македонците во Германија. П.Р.
