Американските комерцијални авиокомпании вчера откажале 1.171 авионски лет, до или од САД, објави „Ројтерс“, наведувајќи дека поради зголемениот број заразени со коронавирус пораснал и бројот на пилоти и членови на екипажите кои се во изолација, додека за бројните откажувања на летовите придонесле и лошите временски услови во некои области.
– Зголемувањето на случаите на Омикрон на национално ниво оваа недела имаше директно влијание врз нашите летни екипажи и луѓето кои ја водат нашата операција. Како резултат на тоа, за жал моравме да откажеме некои летови и однапред ги известуваме погодените клиенти за нивното доаѓање на аеродромот – стои во соопштението на „Јунајтед ерлајнс“.
Божиќните празници во САД се совпаднаа со растечкиот број случаи на омикрон, кои сочинуваат три четвртини од вкупниот број на новите случаи во земјата. Вчера беше трет ден по ред со голем број откажани летови во САД. За Божиќ биле откажани 997 летови, а за Бадник речиси 700. Поради омикрон, бројот на случаи во САД се зголемил за 45 отсто, па така на дневно ниво бројката на заразени изнесува 179.000, според пресметките на „Ројтерс“.
Во меѓувреме, авиокомпанијата „Делта“ изјави дека ги „исцрпиле сите опции и ресурси“ – вклучително и пренасочувањето и замената на авиони и екипажи за покривање на планираните летови – пред да откаже околу 90 летови за петок, Таа го обвини влијанието на варијантата омикрон и временските услови за откажувањата.
Главниот извршен директор на „Делта“, Ед Бастијан, побара од шефот на американските Центри за контрола и превенција на болести (ЦДЦ) да го намали периодот на самоизолација за вакцинираните кои се соочуваат со пробивни инфекции од 10 на пет дена.
Најпогодени се аеродромите во Сиетл, Атланта, Лос Анџелес, аеродромот Далас-Форт Ворт и аеродромот „ЏФК“ во Њујорк.
