Домаќинот на Летните олимписки игри Токио, кој е под вонредна состојба поради ковид-19, денес објави рекордни 2.848 случаи на новозаразени, соопштија јапонските власти.
Најновите податоци, кои го надминаа претходниот рекорд од 2.520 случаи регистрирани на 7 јануари, доаѓаат во време кога постои зголемена загриженост од ширењето на многу заразниот делта-сој, пренесува јапонската новинска агенција Кјодо.
Седумдневниот просек на потврдени случаи на коронавирус се искачи на 1.762,6 на ден, што е за 49,4 проценти повеќе од претходната недела.
Здравствени експерти кои ја советуваат владата предупредија на можна „критична“ ситуација во врска со коронавирусот во Токио, доколку истиот продолжи да се шири со сегашното темпо.
Четвртата вонредна состојба во Токио, која е во сила до 22 август, го опфаќа целиот период на Олимписките игри, кои траат до 8 август.
