Изгледа дека напорите на „Мета“ за промовирање на Тредс конечно се исплатат, бидејќи извршниот директор на компанијата, Марк Закерберг, потврди дека апликацијата сега има нешто помалку од 100 милиони месечни активни корисници и дека тој мисли дека има „добри шанси“ да достигне милијарда корисници во следните неколку години.
– Долго време размислував дека треба да има апликација за разговор што ќе ја користат милијарда луѓе, која е малку попозитивна, и мислам дека ако продолжиме вака уште неколку години, имаме добри шанси за реализација на нашата визија – рече Закерберг за време на кварталниот извештај за заработка.
Растот на Тредс беше внимателно следен од неговото лансирање во јули. Апликацијата доби 100 милиони регистрирани корисници во првата недела, но следуваше брз пад, со поплаки на корисниците за ограничена функционалност и преполн ѕид со објави на брендови. Но, „Мета“ постепено додава нови функции, а ангажманот се чини дека се зголеми во последниве недели, додека Илон Маск истовремено прави непопуларни промени на неговата социјална мрежа Х, како што е отстранување наслови од линкови. „Волстрит журнал“ објави дека Тредс неодамна успеал да привлече „моќни корисници“ од Х.
Растот на Тредс не е единствената светла точка за „Мета“, која објави приходи од нешто над 34 милиони долари за кварталот, што е за 23 отсто повеќе од минатата година. Сега 3,9 милијарди луѓе користат една од апликациите на „Мета“ секој месец, што е ново за компанијата. Зборувајќи со аналитичарите, Маск рече дека фокусот на „Мета“ на „ефикасноста“ резултираше со повеќе од 20.000 скратувања на работни места во текот на изминатата година, што докажува ефикасна стратегија во „многу нестабилниот свет“.
Закерберг рече дека „Мета“ сѐ повеќе се фокусира на унапредување на генеративната технологија на вештачка интелигенција, која има моќ да ги промени сите услуги на компанијата.
– Генеративната вештачка интелигенција значително ќе го трансформира начинот на кој луѓето ги користат различните апликации што ги развиваме – рече Закерберг.
