Според американскиот туристички магазин „Травел плас лежр“, малото живописно село сместено на врвот на карпа, на надморска височина од 340 метри, е едно од најубавите села во светот. Станува збор за Гордес во Франција, а овој скапоцен камен на Прованса секоја година привлекува посетители од целиот свет поради својата безвременска убавина, културно богатство и шарм. Сега, напролет, Гордес е особено магичен поради сите бои и мириси од природата, кои вреди да се искусат.
Историјата на Гордес датира од римско време, но во текот на средниот век селото ја добило сегашната конфигурација, со тесни улички, заоблени премини, куќи од сув камен и фасцинантен средновековен замок со поглед на долината. Со векови напредува благодарение на земјоделството, а особено е познат по производството на керамика, традиција што продолжува и денес.
Убавината на ова митско село лежи во неговата архитектура, со добро одржувани камени градби, кои совршено се вклопуваат во околниот пејзаж, во кој доминира величествената природа. Изграден во 11 век, проширен и реновиран со векови, замокот Гордес е едно од највпечатливите места што вреди да се посетат, а денес нуди прекрасен поглед од неговите кули и бедеми.
Пазарот во Гордес на плоштадот на замокот секој вторник наутро е настан што не се пропушта и претставува уште еден белег на културниот живот на селото. Посетителите можат да откријат локални производи, ракотворби и сувенири од овој магичен француски регион.
Гордес е исто така популарна локација за снимање филмови и телевизиски емисии поради својата безвременска убавина и живописна атмосфера.