Затворени избирачките места во Русија
Во Москва гласачките места за изборите за претседател на Русија беа затворени точно во 20 часот по локално време, а тридневните избори завршуваат во Калининградската област, најзападната руска ексклава на Балтичкото Море, пренесува МИА. Веќе се објавуваат и првите излезни анкети, според кои, актуелниот руски претседател Владимир Путин освоил 87,97 отсто од гласовите.
Според РИА Новотки, истиот процент на освоени гласови го утврдила и Централната изборна комисија по преброени 24,4 отсто од гласачите ливчиња.
Николај Харитонов од Комунистичката партија има 3,8 отсто од гласовите, Владислав Даванков од партијата Нови луѓе 3,73, а Леонид Слуцки од Либерално-демократската партија 2,96 отсто.
Вкупната излезност на претседателските избори во Русија е 74,22 отсто. Одзивот на гласачите во Москва била околу 66 отсто.
Резултатот на Путин е рекорд во историјата на модерна Русија. Во 2018 година, тој освои 76,69 отсто, а во 2012 година – 63,6. Дмитриј Медведев победи во 2008 година со добиени 70,28 отсто од гласовите. Во 2004 и 2000 година Путин победи со 71,31 и 52,9 отсто. Во 1996 година, пак, Борис Елцин победи во вториот круг со освоени 53,82 отсто од глаовите на рускиот електорат.
Гласањето во Русија траеше три дена, а гласачите можеа да изберат дали ќе гласаат на традиционален начин, користејќи хартиени гласачки ливчиња или електронски преку терминали за гласање. Можноста за електронско гласање на овие избори ја искористиле осум милиони Руси.
Ова се први претседателски избори на кои гласаат и жителите на четирите украински региони – регионите Донецк, Луганск, Запорожје и Херсон, кои беа анектирани од Русија во септември 2022 година.
Според руски извори, во Донецк, Луганск, Запорожје и Херсон можеа да гласаат вкупно околу 4,5 милиони луѓе. На изборите гласаа и жителите на црноморскиот полуостров Крим, кој Москва го анектираше во 2014 година.
Украина го оцени гласањето на окупираните територии како кршење на меѓународното право, и го повика светот да не ги признава изборните резултати. Изборите во анектираните украински делови ги осудија и генералниот секретар на ОН Антонио Гутереш и повеќе западни државници.
Претседателските избори ги набљудуваат делегации од 36 земји и пет меѓународни организации, а акредитирани се повеќе од 200 парламентарни набљудувачи и неколку десетици експерти за изборниот процес.
Во Русија право на глас имаат околу 110 милиони граѓани. Конечните резултати од претседателските избори треба да бидат објавени најдоцна до 28 март.
