Преговори под посредство на Катар
Катар преговара за ослободување на десетина заложници киднапирани од Хамас во Појасот Газа во замена за прекин на огнот на територијата под палестинска контрола, која е опколена и бомбардирана од Израел.
– Во координација со САД, Катар посредува за ослободување на 10-15 заложници во замена за прекин на огнот за еден или два дена – рече изворот во изјава за француски медиуми, кој сакаше да остане анонимен.
Извор близок до Хамас беше цитиран дека се разговара за тридневно примирје во замена за ослободување на 12 заложници, меѓу кои и шестмина Американци.
Повеќе од 240 луѓе се заложници и однесени во Газа во нападот на милитантите на Хамас на израелска територија на 7 октомври.
Според израелските власти, најмалку 1.400 луѓе загинале во Израел од почетокот на војната предизвикана од овој напад, од кои повеќето цивили, убиени на 7 октомври.
Во Појасот Газа, како резултат на израелските одмазднички акции насочени кон уништување на Хамас, загинале 10.569 лица, меѓу кои 4.324 деца, соопштија здравствените власти на палестинското исламско движење.
Катар, каде се наоѓа политичкото биро на Хамас и обезбеди милиони долари финансиска помош за Газа, беше вклучен во посредувањето во октомври што доведе до ослободување на четворица заложници – Американка и нејзината ќерка и две Израелки.
