Поранешниот американски претседател Доналд Трамп, републиканскиот кандидат за реизбор следната година, е обвинет по 37 точки од обвинението за незаконско задржување доверливи документи и обид за попречување на правдата по напуштањето на Белата куќа во 2021 година.
Министерството за правда ги објави документите за обвинението на денот кога двајца адвокати на Трамп поднесоа оставка. Обвинет е и поранешниот претседателски помошник Волт Наута. Обвинението се заснова на ракувањето на Трамп со чувствителните владини материјали што ги зел со себе кога ја напуштил функцијата во јануари 2021 година.
Американските воени тајни, нуклеарната програма Трамп ги чувал во бањата. Тој треба да се појави пред судот во Мајами првпат во вторник, ден пред неговиот 77 роденден.
Во обвинението се наведува дека меѓу тие документи имало и чувствителни воени тајни на САД, вклучително и оние за нуклеарната програма и потенцијалните ранливости на земјата во случај на напад. Еден документ се однесува на поддршката на една земја за тероризмот против американските интереси.
Материјалите дошле од Пентагон, ЦИА, Националната агенција за безбедност и други разузнавачки агенции, се наведува во обвинението. Се тврди дека Трамп на едно лице му покажал документ на Министерството за одбрана за „план за напад“ против друга земја.
Обвинението против поранешен американски претседател на федерално ниво е без преседан во американската историја и се случува додека Трамп е републиканскиот фаворит да биде кандидат на изборите следната година.
Инспекторите заплениле приближно 13.000 документи на имотот на Трамп Мар-а-Лаго во Флорида пред една година. Стотина од нив биле означени како доверливи, иако еден од адвокатите на Трамп претходно изјави дека сите такви документи и се вратени на владата.
-Јас сум невин човек! – напиша Трамп на својата социјална мрежа Трут сошл во четвртокот – по објавувањето на обвинението.
Претходно тој изјави дека ги декласифицирал тие документи додека бил претседател, но неговите адвокати не го искористиле тој аргумент на суд, пренесува Ројтерс. Си-ен-ен денеска објави дека Трамп во аудио снимка рекол дека по напуштањето на Белата куќа чувал доверливи воени информации, кои би можеле да бидат клучни докази во случајот.
Ова е втора кривична постапка против Трамп, кој следниот март ќе оди на суд во Њујорк поради наводното плаќање на порно ѕвезда за да молчи за нивната врска. Доколку победи на реизборот, Трамп како шеф на федералната влада ќе има овластување да го запре процесот за доверливи документи, но не и оној во државата Њујорк.
