ФОРМУЛА 1
- Ќе биде важно да ја завршам сезоната добро, силно, за да имам самодоверба, а и да можам да ја стекнам самодовербата пред 2027 година, рече Антонели
Новиот светски шампион во Формула 1, Кими Антонели, вели дека ги третира последните трки сезонава како почеток на неговата подготовка за задржување на титулата следната година, пишува „Би-би-си“. Возачот на Мерцедес стана најмладиот шампион во историјата на Формула 1, само во својата втора сезона, со победата на трката во Мексико Сити пред десетина дена. Антонели ја имаше својата прва трка откако ја освои титулата на големата награда на Сао Паоло, синоќа.
– Всушност, многу сум возбуден што сум тука. Ова е добра можност за мене, пред сѐ, знаете, да се обидам да ја завршам сезоната на врвот, но, исто така, чувствувам дека моите подготовки за 2027 година почнуваат сега. Ќе биде важно да ја завршам сезоната добро, силно, за да имам самодоверба, а, исто така, и да можам да ја стекнам самодовербата пред 2027 година – рече тој.
Антонели се осврна на своето достигнување на медиумскиот ден на патеката. Тој рече дека идејата да се биде светски шампион „уште се чувствува надреално“. Еден од неговите најценети моменти по победата во Мексико беше кога Луис Хамилтон и Макс Ферстапен го кренаа на своите рамена на подиумот по трката.
– Веќе ја врамив таа фотографија и дефинитивно ќе ја закачам на ѕидот бидејќи е таков момент. Кој би го рекол тоа? Не би очекувал да ја прославам мојата титула на тој начин. Па дефинитивно кога ме кренаа беше црешата на тортата. Секогаш ќе им бидам благодарен што го направија тоа бидејќи, пред сѐ, да го добијам тоа од двајца неверојатни возачи што ја напишаа историјата на спортот е многу посебно. И, исто така, уште поспецијално бидејќи беше вистинско. Тоа беше нешто што тие навистина сакаа да го направат. Значи, тоа беше многу посебен момент и дефинитивно се надевам дека ќе можам повторно да ги видам за да им се заблагодарам соодветно со малку смиреност, бидејќи беше едноставно многу посебно – вели Антонели, пренесе „Би-би-си“. Н.М.
