Фудбалот е едноставна игра. Дваесет и двајца бркаат топка 90 минути, а на крајот, Германците секогаш победуваат. Оваа позната дефиниција за фудбалот на поранешниот англиски репрезентативец Гери Линекер не секогаш се покажува како точна. Тоа беше случај и вечерва, благодарение на Македонија која ја совлада Германија со 2-1 во мечот од квалификациите за Светското првенство (СП) во 2022 година, одигран во Дуисбург.
Тоа го покажаа и стрелците Горан Пандев и Елиф Елмас, како и сите македонски репрезентативци и стручниот штаб кои заедно ја остварија вредната победа. А во неточноста на дефиницијата можеше да се увери и противничкиот селектор Јоаким Лев, под чие водство Германија вечерва го претрпе првиот пораз во меч за пласман на СП, по 29 победи и три нерешени.
Токму Линекер на Твитер изрази изненадување за триумфот на Македонија, пишувајќи „побогу, Германија загуби од Северна Македонија“.
Good heavens, Germany have lost to North Macedonia.
— Gary Lineker ? (@GaryLineker) March 31, 2021
Прославениот напаѓач потоа додаде дека Македонија никогаш досега не се пласирала на Светско првенство. Можеби исто како и неговата дефиниција за фудбалот и тоа ќе се смени по тековниот квалификациски циклус за Мундијалот во Катар.
