По концертите со Симфонискиот оркестар на Квебек во Канада на крајот од минатиот месец и гостувањата со рецитал во Мајнц, Германија, со Филхармонискиот оркестар на Монте Карло во Монако (каде што со голем успех и блескави критики ја почна резиденцијалната серија од четири различни концертни возбудувања во текот на сезонава) и трите настапи со Симфонискиот оркестар на Детроит во овој американски град, нашиот пијанист од светски глас Симон Трпчески продолжува со балкански концерти на кои со своите пријатели ќе го изведе проектот „Македонисимо“.
Трпчески, Краповски, Сомов, Мамудов и Нушев во овој концертен циклус настапуваат во Сомбор, Србија, потоа во концертната сала „Ватрослав Лисински“ во Загреб, Хрватска, па се враќаат во Србија за гостувањето на фестивалот „Номус“ во Нови Сад, заокружувајќи ја серијата со концерт во Темишвар, Романија, на 28. овој месец. Нашиот пијанист веќе наредниот месец е на турнеја во Австралија, а исполнетиот распоред до крајот на годинава, како што информира „КултурОп“, го води и на концертите со Лондонскиот симфониски оркестар и повторната соработка со прославениот диригент Џанандреа Нозеда.
Во рамките на најавите за новиот албум на Трпчески, чие излегување се очекува наредниот месец, нашиот пијанист гостуваше во популарната рубрика „Музика за моите уши“ на „Би-би-си музичкиот магазин“, на чии страници одговори на прашањето што слуша во моментов. Така, освен „Пијано концертот број 5“ од Сен-Санс што наскоро треба да го сними и Симфонијата број 10 од Шостакович, Трпчески духовито се навраќа и на македонската хит-песна „Мара“ на „Нулта позитив“ и нејзините многубројни алузии.
