Медицински совет
Ново истражување покажа дека дневното внесување витамин Д може да го забави биолошкото стареење и да помогне во заштитата на телото од болести поврзани со стареењето. Витаминот Д, познат како витамин на сонцето, со години се поврзува со здравјето на коските и зајакнувањето на имунитетот, но новото истражување сугерира дека може да има уште поважна улога – помагајќи му на телото да старее побавно. Американски научници открија дека дневното внесување додатоци на витамин Д може да го забави скратувањето на теломерите, заштитни структури на краевите на хромозомите што се поврзани со стареењето и развојот на голем број болести.
Витаминот Д е најпознат по тоа што му помага на телото да го апсорбира калциумот и да го одржува здравјето на коските, но научниците веќе некое време го истражуваат неговото влијание врз имунитетот. Преглед на претходните истражувања покажа дека додатоците на витамин Д можат да го намалат ризикот од респираторни инфекции, особено кај луѓе што имаат недостиг од витаминот. Првите истражувања исто така сугерираат дека може да има заштитна улога кај автоимуни болести како што се ревматоиден артритис, лупус и мултиплекс склероза, иако експертите предупредуваат дека се потребни повеќе истражувања. Научниците веруваат дека антиинфламаторното дејство на витаминот Д би можело да го објасни неговиот позитивен ефект врз теломерите, бидејќи хроничното воспаление го забрзува нивното скратување. На ова дополнително влијаат пушењето, хроничниот стрес и депресијата.
