Рускиот претседател Владимир Путин го одржа својот долгоочекуван голем говор пред двата дома на рускиот парламент, истакнати јавни личности и пред лидери на верски организации, кој траеше речиси еден час и 50 минути, што веројатно е неговиот најдолг говор досега. Околу една третина од говорите беа фокусирани на надворешни работи, а околу две третини за внатрешните работи
Рускиот претседател Владимир Путин рече дека говорот го одржува во многу тешко време, во време кога се случуваат историски промени за Русија и нејзиниот народ.
– Одговорноста за поттикнувањето на украинскиот конфликт, за неговата ескалација, за зголемувањето на бројот на неговите жртви е целосно на западните елити. И, се разбира, на денешниот режим во Киев, за кој украинскиот народ е туѓ. Денес, украинскиот режим не им служи на националните интереси, туку на интересите на трети земји. Западот ја користи Украина како разбивачки овен против Русија и како полигон за обука. Нема да се задржувам на обидите на Западот да го смени текот на непријателствата, но на сите треба да им биде јасна една околност – колку повеќе западните системи со долг дострел доаѓаат во Украина, толку повеќе ќе бидеме принудени да ја туркаме заканата подалеку од нашата граница. Тоа е природно! А народот (Украинците), никој не размислуваше за нив, ги подготви за колење и на крајот ги претвори во потрошен материјал – рече Путин.
Претседателот на Русија опширно ја објаснуваше ситуацијата во Украина.
– Ние имаме огромна одговорност да ги заштитиме луѓето од нашите историски земји. Со цел да се обезбеди безбедноста на нашата земја од заканата што доаѓа од неонацистичкиот режим што се разви во Украина по државниот удар во 2014 година, беше одлучено да се спроведе специјална воена операција. Почнувајќи од 2014 година, Донбас се бореше, го бранеше правото да живее на својата земја, да зборува на својот мајчин јазик и не се откажа од сѐ во услови на блокада и постојано гранатирање од режимот на Киев. Тој веруваше и очекуваше дека Русија ќе му дојде на помош. Во меѓувреме… направивме сѐ што е можно… по мирен пат да го решиме овој проблем… А зад нашиот грб се подготвуваше сосема поинакво сценарио на западните владетели. Нивните уверувања за желбата за мир во Донбас, како што сега гледаме, се покажаа како сурова лага. Тие постојано се занимаваа со шиканирање, замижуваа на политичките убиства, на репресиите на режимот во Киев против непожелни луѓе, на исмејување на верниците, на украинските неонацисти, на терористичките акции во Донбас. Офицерите на националистичките баталјони беа обучени во западните академии и училишта и беа снабдени со оружје – беше остар рускиот лидер.
Путин рече и дека Западот ги споменува договорите од Минск кога Русија искрено се обидуваше да најде мирно решение.
– Тие си играа со животите на луѓето и играа валкана игра. Нивните лаги и дволичност беа видени во Југославија, Ирак, Сирија… Мислеа дека можат да направат сѐ, но испадна дека така се однесуваат кон сопствениот народ и го доведуваат во заблуда сопствениот народ кажувајќи му за мировните договори за Донбас, сето тоа се лаги. Ние инсистиравме да ги заштитиме нашите интереси и да ја заштитиме нашата позиција. Бевме многу отворени и искрени за дијалог со Западот и инсистиравме Европа и остатокот од светот да имаат ист систем на одбрана и безбедност. Ова им го предложивме на нашите партнери, а за возврат слушавме неискрени одговори. Тие сакаа да го прошират НАТО кон нашите граници – рече Путин.
Тој рече дека Западот ги зајакнува своите воени сили по должината на руската граница.
– Во декември 2021 година официјално им пристапивме на САД и Европа и побаравме безбедносни гаранции и добивме директно отфрлање. Тогаш стана јасно дека заканата расте и немаше сомнеж дека во февруари 2022 година сѐ беше подготвено за акција во Донбас – рече Путин.
Путин во својот говор до нацијата и светот порача дека Русија планира масовно производство на напредно оружје.
– Имаме план за создавање воени сили за 2023 година и следната година. Работиме на тоа. Ќе ги зајакнеме и армијата и морнарицата. Овие планови мора да ги засноваме на вистинско воено искуство. Подготвеноста на нашите нуклеарни сили е повеќе од 90 отсто. Офицерите што покажуваат одлучност и интелигенција и храброст, тие мора да бидат напреднати во воените академии. Мора да го цениме нивниот придонес во одбраната на татковината. Ние ќе продолжиме да ги имплементираме најновите технологии, кои ќе го зголемат квалитетот на нашата армија. Некои од овие технологии се веќе таму, а некои се подобри од западната воена опрема. Нашата цел е да постигнеме масовно производство на такво оружје – рече тој.
Рускиот претседател им се обрати на олигарсите што живеат на Запад. Тој зборуваше за проблемите што ги имала поранешната советска економија.
– Се сеќаваме на проблемите од 90-тите, но потоа земјата почна да создава нова економија заснована на пазарни принципи. Западните земји ни беа модел, но не е доволно да го копираме нивниот пример. ЕУ и САД се расправаа за тоа како треба да се развива руската економија. Станавме извозник на стоки, нашите бизниси се базираа на продажба на ресурси, нафта и гас. Парите не беа инвестирани во долгорочни проекти. Постигнавме видливи резултати, но сакам да нагласам дека, кога ќе се земат предвид условите во кои се развиваше нашата индустрија, капиталот отиде на Запад наместо да го развива нашето производство и да вработува луѓе во Русија. Подоцна почнаа да инвестираат во Русија исто така, но првиот бран беше насочен кон потрошувачката на западните производи. Таму ги образоваа и децата, а на државата ѝ беше тешко да го спречи тоа бидејќи имаме пазарна економија – рече Путин.
Тој додаде дека оние што ја гледаат Русија само како извор на приход и планираат да живеат во странство, виделе дека Западот само ги ограбува.
– Се шегував со таквите дека ќе одат на западните судови и ќе се обидат да го спасат своето богатство. Ниту еден обичен Русин не жали за оние што ги изгубија своите банкарски сметки и палати на Запад. Сигурен сум дека се сеќаваат на приватизацијата во 90-тите кога државното богатство премина во нивни раце. Западот има цел да ѝ стави крај на Русија, тие сакаат таа повеќе да не биде моќен играч на Истокот. Тие сакаат сопствениците на големите бизниси во Русија да бидат зависни од Западот, ние не можеме да го толерираме тоа – рече тој.
Русија ќе изгради нови логистички коридори, ќе развие внатрешни правци и излези кон Азија, рече понатаму Путин. Земјата ќе посвети посебно внимание на меѓународниот коридор Север – југ, Транссибирската железница, Северниот морски пат и развојот на Сибир. Следната година најмалку 85 отсто од магистралните и најмалку половина од регионалните патишта ќе бидат доведени во стандардна состојба.
Соединетите Американски Држави преку НАТО ѝ поставуваат ултиматум на Москва за новиот договор СТАРТ, рече Путин. Вашингтон бара исполнување на сите точки, додека тој самиот планира „да се однесува како што сака“. Според Путин, Министерството за одбрана и „Росатом“ треба да бидат подготвени да тестираат руско нуклеарно оружје, доколку тоа прво го направат САД.
