фото: Кабинет на претседателот

Денеска се потсетуваме на еден од најтешките денови во историјата на нашиот главен град Скопје, кога на 26 јули од 1963 година, пред точно 59 години, во 05 часот и 17 минути, катастрофален земјотрес одзеде над 1000 животи на нашите сограѓани, а многумина останаа без покрив над главата – Скопје беше разрушено, напиша министерот за внатрешни работи Оливер Спасовски на неговиот фејсбук-профил.

– Глобалната помош и поддршка од 87 нации ширум светот го трансформираше Скопје во град на солидарноста, а поуката од тоа ја носиме сите, скоро 6 деценции, дека безбедноста на граѓаните е врвен приоритет и дека само со заедништво можеме да го изградиме општеството за сите. Да не се заборават настраданите, да не се заборави хуманоста на светот – објави Спасовски на фејсбук.

Премиерот Димитар Ковачевски порача дека 26 јули е потсетник дека наша должност е на новите генерации да им ја пренесеме љубовта, еснафскиот дух и пожртвуваноста со кои градот се градеше и развиваше, но и да им оставиме аманет никогаш да не ги забораваат жртвите од земјотресот на кои денес им оддаваме почит.

– На денешен ден во 1963, во точно 5 часот и 17 минути, накратко запре срцето на Скопје. Катастрофалниот земјотрес однесе многу човечки животи и направи огромна материјална штета. Но, со трудот и пожртвуваноста на скопјани и на пријателите од целиот свет кои несебично подадоа рака, од рушевините се роди едно ново Скопје. Скопје кое стана синоним на солидарност, етничка и архитектонска шареноликост, на еден нов, модерен космополитски дух. Тоа е вистинскиот код на градот – стои во фејсбук објавата на премиерот Ковачевски.

Претставници од претседателскиот кабинет и делегација на владата предводена од вицепремиерот Бојан Маричиќ во придружба на министерот за правда Никола Тупанчевски и заменик-министерот за правда Агим Нухиу, денеска по повод годишнината, положија свежо цвеќе на споменикот на жртвите од земјотресот.