ВМРО-ДПМНЕ, Алијанса за Албанците и Алтернатива се договорија за заеднички настап на изборите, по средбата што денеска ја остварија првите луѓе на опозициските партии – Христијан Мицкоски, Зијадин Села и Африм Гаши.

Од партиите преку заедничко соопштение истакнаа дека „со цел што подобро да се артикулира опозицискиот глас, како и да се претстават најдобро интересите на сите граѓани на локално ниво, тројцата претседатели, се одлучија за взаемна соработка и поддршка на кандидати за градоначалници“.

Соработката подразбира дека партиите нема да кандидираат градоначалници во одредени општини и ќе се поддржуваат меѓусебно, а во други општини ќе се натпреваруваат со сите други партии.

Средбата помеѓу партиските лидери се случи во пратеничката канцеларија на коалицијата Алијанса за Албанците и Алтернатива. Мицкоски, Села и Гаши како главен мотив за соработката ја посочија борбата против корупцијата и криминалот застапени во општините раководени од СДСМ-ДУИ.

Тројцата претседатели констатираа дека водејќи се од извештајот на Транспаренси Интернешенл, според кој Македонија е рангирана на историско најлошото 111 место, станува неминовна опозициската соработка, со цел единиците на локалната самоуправа да бидат ослободени од корупциското владеење, од нетранспарентното трошење на пари и од злоупотреба на власта на СДСМ и ДУИ на сите нивоа на државната управа.

Затоа, констатираа тие, потребно да се соработува со цел општините да бидат институции во служба на граѓаните, со силен и рамномерен локален економски развој, со буџетска поддршка за децентрализација во областите образование, култура и спорт, како и со тежнеење да бидат зелени општини кои ќе обезбедат чист воздух и заштита на животната средина.