Бензините од полноќ ќе се продаваат по цена пониска за 7 денари за литар, додека дизелот поевтинува за 5,5 денари. Одлуката ја донесе денеска Регулаторната комисија за енергетика, водни услуги и услуги за управување со комунален отпад (РКЕ), со која малопродажните цени на нафтените деривати во просек се намалуваат за 7,51 процент.
Со новата одлука, цената на ЕУРОСУПЕР БС-95 ќе изнесува 86 денари за литар, ЕУРОСУПЕР БС-98 ќе се продава за 88 денари, а ЕУРОДИЗЕЛ БС (Д-Е V) ќе чини 94,5 денари за литар.
Намалување има и кај другите нафтени деривати. Екстра лесното масло за домаќинство (ЕЛ-1) поевтинува за 6,5 денари и ќе се продава за 103,5 денари за литар. Цената на мазутот М-1 НС се намалува за 6,261 денари за килограм, односно ќе изнесува 49,312 денари.
Од РКЕ информираат дека намалувањето на цените е резултат на падот на референтните цени на нафтените деривати на светскиот пазар во споредба со претходната пресметка.
Референтните цени на бензините бележат намалување во просек за 12,340 проценти, дизелот за 6,785 проценти, екстра лесното масло за 7,834 проценти, а мазутот за 13,816 проценти. Дополнително, курсот на денарот во однос на американскиот долар е понизок за 0,5247 проценти во споредба со претходната пресметка.
Во пресметката на новите цени е применета и владината одлука за намалување на ДДВ за ЕУРОДИЗЕЛ (Д-Е V) на 10 проценти, како и намалената акциза за 2 денари за литар кај бензините ЕУРОСУПЕР БС-95 и ЕУРОСУПЕР БС-98 и за 4 денари за литар кај ЕУРОДИЗЕЛ.
