Канада од денеска воведе контрацарини за американски производи во вредност од околу 20 милијарди американски долари, соопшти канадското Министерство за финансии. Мерката е одговор на царините што ги воведе администрацијата на американскиот претседател Доналд Трамп и следува по неуспехот на трговските преговори меѓу двете земји.
Новите мерки опфаќаат повеќе од 700 американски производи, со царински стапки од 15, 25 и 50 проценти. Меѓу засегнатите производи се челикот и алуминиумот, земјоделската опрема, мебелот, облеката и електрониката.
Канада ги воведува контрамерките откако САД претходно наметнаа царини од 50 проценти за дел од канадската стока, што дополнително ги заостри трговските односи меѓу Вашингтон и Отава.
Дополнителна тензија предизвика и изјавата на Трамп во врска со канадскиот производител на авиони „Бомбардие“. Американскиот претседател порача дека компанијата не треба да може да ги продава своите авиони на американскиот пазар доколку не ги произведува во САД.
Со воведувањето на новите контрацарини, трговскиот спор меѓу двете соседни земји дополнително се продлабочува, додека засега нема активни билатерални преговори за негово надминување.
