Цените на нафтата продолжија да се намалуваат и денеска на светските пазари, откако инвеститорите забележаа знаци за обновување на поморскиот сообраќај низ Ормутска Теснина и напредок во мировните преговори меѓу Соединети Американски Држави и Иран.
Фјучерсите за сурова нафта од типот Брент поевтинија за 94 центи, или 1,22 проценти, на 77,7 долари за барел. Американската лесна сурова нафта (WTI) поевтини за 77 центи, или 1,04 проценти, на 73,09 долари за барел.
Двата главни нафтени референтни типа изгубија повеќе од 3 проценти од вредноста во претходната трговска сесија, откако Вашингтон одобри привремено олеснување на санкциите за Техеран по првичната рунда мировни преговори, а истовремено беа забележани знаци за намалување на тензиите во регионот.
И покрај падот на цените, аналитичарите предупредуваат дека инвеститорите остануваат внимателни поради продолжената недоверба меѓу Вашингтон и Техеран и можните идни геополитички ризици.
