Ракометниот портал „24 Ракомет“ по четврт пат го реализираше изборот на тимот на сезоната во женската Супер лига 2025/26, во кој убедливо доминираат ракометарките на Ѓорче Петров, клуб кој уште еднаш потврди дека е еден од главните носители на квалитетот во македонскиот женски ракомет.
На левото крило местото во идеалниот состав го заслужи Емилијана Ризоска, која со своите настапи беше меѓу најконстантните во шампионатот, додека на позицијата лев бек признанието го доби Марија Јанкуловска, една од клучните ракометарки во играта на Ѓорче Петров.
За најдобар организатор на играта, односно среден бек, избрана е Габриела Величковска од Чаир, која со својата креативност и лидерски квалитети остави силен впечаток во текот на сезоната.
На десната бековска позиција се најде Теодора Дукоска, уште едно важно име од шампионскиот состав на Ѓорче Петров, додека на десното крило место во тимот на сезоната доби Марија Гугуљанова, која со својата брзина и ефикасност беше значаен адут на својот тим.
На пивотменската позиција признанието го заслужи Сара Цветановска од Спартак, која со своите игри се издвои како една од најдобрите на својата позиција, додека за најдобар дефанзивец е избрана Александра Коловска од Чаир.
Признанието за најдобра млада ракометарка заврши кај Таида Беровиќ од Вардар, која со своите настапи покажа дека е голем талент и едно од новите имиња на македонскиот женски ракомет.
За тренер на сезоната е прогласен Александар Царчев, стратегот на Ѓорче Петров, кој успеа да го предводи својот тим до уште една успешна сезона и да ја потврди доминацијата на клубот во домашниот шампионат.
Со овој избор, реализиран од „24 Ракомет“, уште еднаш беше потврден квалитетот што го понуди Супер женската лига во сезоната 2025/26, како и доминацијата на најдобрите екипи и појавата на нови млади ракометарки кои се иднината на македонскиот женски ракомет.
