Утрово, во Брисел, остварив средба со претставниците на земјите членки во Работната група за проширување при Советот на Европската Унија (КОЕЛА), информираше министерот за надворешни работи, Тимчо Муцунски.
– Ја реафирмирав посветеноста на Владата кон европскиот пат, со фокус на испорачување конкретни реформски резултати за подобрување на животот на граѓаните и натамошно усогласување со стандардите на ЕУ. Го нагласив напредокот во реформската агенда, постојната координација и активниот пристап на сите институции во оваа насока. Направив пресек на тековните активности што Владата ги презема за забрзување на интегративниот процес, нагласувајќи ја неопходноста од јасен, предвидлив и на заслуги заснован пристапен процес, како заеднички интерес и за земјите кандидати и за земјите членки – објави тој на социјалните мрежи.
