Најдобрите 20 клуба што генерираат приходи во светскиот фудбал остварија
рекордни 11,2 милијарди евра во сезоната 2023/2024
Реал Мадрид стана првиот фудбалски клуб што остварил повеќе од една милијарда евра годишен приход, според анализата на „Делоит“. Шпанскиот клуб го задржа првото место во студијата на „Делоит“ со приход од 1,05 милијарда евра од сезоната 2023/2024, во која ги освои титулите во Шпанија и во Лигата на шампионите. Манчестер сити е втор со приход од 838 милиони евра, Пари сен Жермен (806 милиони евра), Манчестер јунајтед (771) и Баерн (765) ја комплетираат првата петорка. Астон вила влезе во првите 20, девет клуба од Англија се меѓу првите 20 (уште Арсенал, Ливерпул, Тотенхем, Челси, Њукасл и Вест хем), а уште пет се меѓу првите 30 (Брајтон, 21.), а Кристал палас, Евертон, Фулам и Вулверхемптон од 26-то до 29-то место, пишува „Би-би-си“.
Најдобрите 20 клуба што генерираат приходи во светскиот фудбал остварија рекордни 11,2 милијарди евра во сезоната 2023/2024, според „Делоит“ и тоа е зголемување од шест отсто во кумулативните приходи од претходната сезона, при што клубовите пријавија рекордни приходи од денот на натпреварот, преносите и од комерцијалните зделки, пишува „Делоит“. Просечната заработка на клуб од оваа листа е 560 милиони евра, составен од 244 милиони евра комерцијални приходи, 213 милиони приходи од емитување и 103 милиони евра приход од денот на меч. Приходите од натпреварите беа најбрзо растечкиот прилив на приходи, зголемувајќи се за 11 проценти до 2,1 милијарди евра, помогнати од зголемувањето на капацитетите на стадионите, цените на билетите и врвната гостопримливост. Комерцијалните приходи останаа најголемиот извор на приходи, зголемувајќи се за 10 отсто до 4,9 милијарди евра и сочинуваат 44 отсто од вкупниот приход, а зголемувањето во однос на претходната година во голема мера беше поттикнато од зголемувањето одржување нефудбалски настани во живо, подобрените перформанси на малопродажбата и порастот на приходите од спонзорства, пишува „Делоит“.
Анализата на „Делоит“ на 15 од водечките клубови за фудбалерки што генерираат приходи првпат покажа вкупен приход од повеќе од 100 милиони евра (116,6). Барселона останува на врвот трета година по ред, при што приходите се искачиле за 26 отсто до 17,9 милиони евра. Н.М.
