Од Европската централна банка велат дека сегашните предвидувања на експертите се далеку од стагфлациско сценарио
Прогнози на дел од финансиските експерти
Прогнозите на приватниот сектор сугерираат дека стагфлацијата во еврозоната е малку веројатна, објави неодамна Европската централна банка (ЕЦБ) во својот економски билтен. Како што пренесува европскиот портал „Политико“, додека последните проекции гледаат значително надолно приспособување на растот и нагорна ревизија на инфлацијата, тековните прогнози на експертите остануваат далеку од сценарио за стагфлација, соопшти ЕЦБ.
Според дефиницијата на ЕЦБ, стагфлацијата се јавува кога инфлациските очекувања ја надминуваат целта на ЕЦБ од два отсто, додека економијата стагнира или се намалува. Двата услова треба да важат најмалку две години.
Прогнозата за реалниот раст на БДП, како што покажува составувачот на прогнози „Консензус економикс“, сепак останува над два отсто, а само тројца прогнозери очекуваат раст под еден отсто за следната година, како што истакнува ЕЦБ. Во исто време, повеќето прогнозери очекуваат инфлацијата да падне под два отсто во втората половина на 2023 година.
Имајќи го предвид тоа, неизвесноста е зголемена, како и разликите меѓу прогнозите, според ЕЦБ. Оваа несигурност се одрази во неодамнешната историја на давање прогнози. Ова време минатата година, повеќето експерти на сличен начин очекуваа инфлацијата да падне под два отсто на крајот на 2022 година, но воопшто не беше забележано дека стапките на инфлација ќе надминат осум отсто.
Сепак, ЕЦБ се трудеше да ги отфрли сугестиите дека регионот може да се соочи со повторување на стагфлацијата што ги погоди економиите во 1970-тите. Конкретно, оттаму тврдат дека е намален ризикот од паралелно зголемување на платите и на цените и покрај силно ограничениот пазар на труд, бидејќи формалните шеми за индексирање на платите се поретки, а помалку работници се обединети во синдикати.
