Украинскиот претседател Владимир Зеленски по полноќ се обрати на Телеграм и ги покани сите пријатели на Украина да го посетат Киев, иако, како што рече, „тоа е опасно, бидејќи НАТО не прогласи зона на забранети летови над Украина“.
– Ги поканувам сите пријатели на Украина да го посетат Киев. Овде може да биде опасно, бидејќи нашето небо се уште не е затворено за руски проектили и авиони. Одлуката за зајакнување на нашиот арсенал во воздухот се уште не е донесена. Не добивме авиони. Но, очите на сите луѓе во светот сега се вперени во нашиот главен град, во Украинците. Сите кои се сега со нас ќе почувствуваат благодарност. Не само од нас, туку и благодарност од другите народи – објави Зеленски на Телеграм.
Посетата на премиерите на Полска, Чешка и Словенија, кои вчера пристигнаа во Киев, е силен гест на поддршка што ја почитуваме, изјави украинскиот претседател Зеленски, кој ги информираше лидерите на овие земји за актуелните настани во војната во неговата земја што почна на 24 февруари.
Премиерите Матеуш Моравјецки, Петер Фиала и Јанез Јанша, кои во главниот град на Украина пристигнаа со воз, се првите странски лидери кои го посетија Киев од почетокот на руската инвазија.
– Вашата посета на Киев во овој тежок момент е силен знак за поддршка на Украина. Ние навистина го почитуваме тоа – наведе Зеленски во објава на Интернет.
На кратко видео објавено од неговата канцеларија се гледа како Зеленски разговара со Моравјецки, Фиала и Јанша, а на разговорите присуствува и полскиот вицепремиер Јарослав Качински.
– Овде воразорениот Киев се создава историја. Овде слободата се бори против светот на тиранијата. Овде иднината на сите нас виси на конец. ЕУ ја поддржува Украина, која може да смета на помошта од своите пријатели, оваа порака денеска ја донесовме во Киев – напиша Моравјецки на Твитер.
Украинскиот премиер Денис Шмигал ја поздрави, како што рече, „храброста на вистинските пријатели“ и објави дека со лидерите на ЕУ земјите ќе разговара за поддршката на Украина и дополнителни санкции против Русија.
Претходно, портпаролот на полската влада во Варшава изјави дека посетата на тројцата државници била договорена на минатонеделниот самит на ЕУ во Версај, Франција.
Како што е потврдено, се било координирано со претседателот на Советот на ЕУ, Шарл Мишел и со претседателката на Европската комисија, Урсула фон дер Лејен.
– Целта на посетата е јасно да се покаже поддршката на Европската унија за Украина и нејзината слобода и независност – напиша чешкиот премиер Фијала на Твитер.
