Мерките против пандемијата од ковид-19 договорени на 21 декември, за да се ограничат контактите и да се спречи ширењето на омикронот, ќе стапат на сила на целата територија на Германија во вторник.
Во целата држава важи правилото за собирање најмногу на десет лица, не сметајќи ги децата до 14 години. Ова правило важи без разлика дали се вакцинирани или невакцинирани.
Доколку меѓу овие лица има невакцинирани лица, тогаш важи правилото дека насобраните можат да бидат едно домаќинство, а најмногу две лица кои припаѓаат на друго домаќинство.
Од денеска се затворени и сите клубови и дискотеки со исклучок на сојузните покраини Берлин и Хамбург. Овде се дозволени клубови, но танцувањето е забрането. Наместо тоа, дозволени се културни настани како изложби или литературни собири.
Од вторник се одржуваат спортски настани пред празни трибини. Собири на отворено се дозволени до 200 луѓе само со примена на дозвола за пристап на вакцинирани или оние кои го прележале вирусот. Истото важи и за културните настани како кино или театар.
Овие мерки стапуваат на сила денеска во неколку сојузни покраини, другите провинции веќе ги спроведоа овие мерки во последните денови.
Остануваат во сила мерките за ограничување на пристапот до работно место и јавниот превоз само за вакцинирани лица, оние кои имале коронавирус или оние кои биле негативно тестирани.
Пристапот до угостителските објекти по правило им е дозволен само на оние кои биле вакцинирани или кои имале коронавирус.
Останува на сила забраната за продажба на пиротехнички средства, што во вторникот ја потврди и Управниот суд во Берлин, со што ја отфрли тужбата на групата трговци.
Забраната за продажба на пиротехнички средства втора година по ред се објаснува со потребата од растеретување на здравствените установи поради големиот број повредени на новогодишната ноќ во последните години и со тоа ослободување на капацитетот за заболените од коронавирус.
Државниот епидемиолошки институт Роберт Кох во вторникот забележа остар пораст на инфекции со коронавирус од новиот сој омикрон.
Експертите од институтот стравуваат дека реалните бројки ќе бидат многу поголеми поради празниците.
Париз и Атина исто така воведуваат построги мерки поради новиот сој омикрон.
Двете земји мерките ги воведуват особено за време на празниците и планираните масовни собири.
Францускиот премиер Жан Кастекс изјави дека нема да има полициски час за новогодишната ноќ.
Кастекс, исто така, рече дека во следните три недели, почнувајќи од понеделник, сите јавни собири ќе бидат ограничени на 2.000 лица за настани во затворен простор и 5.000 лица за настани на отворено.
Потрошувачката на пијалаци и храна ќе биде забранета во комерцијалниот сообраќај на долги релации, како и во кината, додека работата од дома ќе стане задолжителна најмалку три дена во неделата кога тоа е можно, рече Кастекс, пишуваат светските медиуми.
Владата исто така донесе одлука носењето маски да биде задолжително на отворено во центрите на градовите.
За разлика од другите земји кои го одложија враќањето на учениците во училиште, француските училишта ќе бидат повторно отворени на 3 јануари, како што беше планирано, рече тој.
Грција исто така одлучи да воведе нови мерки во борбата против новиот сој омикрон.
Според министерот за здравство на Грција, Танос Плеврис, мерките се донесени по препораките на експертската комисија, а ќе бидат на сила од 3 до 16 јануари 2022 година.
Маските кои обезбедуваат поголема заштита ФФП2 или КH95 ќе бидат задолжителни во јавниот превоз, супермаркетите и сите места каде што се собираат повеќе луѓе, како и на местата каде што се служи храна.
Ако тоа не е можно, ќе бидат потребни двојни хируршки маски.
Рестораните и баровите нема да можат да работат по полноќ, а музиката ќе биде дозволена само со почитување на мерките.
