Со концертот на словенечкиот саксофонист и композитор Васко Атанасовски и „Полифонија“, вечерва ќе заврши седмото издание на „Скопскиот градски фестивал“, во организација на „Баги комуникации“. Зад фестивалот се неколку исклучителни концертни вечери, секоја со свој карактер, звук и енергија. Уметници од шест земји, премиерни изведби, нови музички соработки и различни генерации музичари ја создадоа годинашната фестивалска приказна, во која се сретнаа џезот, класичната музика, современото авторско творештво и музичките традиции на Балканот.
Силно фестивалско доживување донесоа Мартин Ѓаконовски, Гент Руши и Танос Ставридис, трио составено специјално за „Скопскиот градски фестивал“. Иако во Скопје за првпат засвиреа заедно, тројцата музичари од Македонија, Албанија и од Грција на сцената функционираа како одамна изградена целина. Нивните различни музички искуства се споија во возбудлив и природен звук, во кој џезот, етното и медитеранските влијанија постојано се дополнуваа. Премиерата на делото создадено за фестивалот покажа колку интересна и автентична музика може да произлезе од една сосема нова уметничка средба.
Сосема поинаква концертна вечер донесоа пијанистката Милјана Николиќ со програмата „Балкански композитори“ и Мухамед Ибрахими со својот настап заедно со пијанистот Бобан Мирковски. Современата класична музика на автори од регионот и препознатливиот авторски израз на Ибрахими создадоа два различни музички света во една вечер и уште еднаш ја покажаа широчината на фестивалската програма.
Еден од концертите што остави најсилен впечаток беше настапот на Антонио Илиоски и Јана Лолова, со кој го промовираа албумот „Beyond The Silence“. Пред публиката поставија сериозен изведувачки предизвик – програма со дела од Брамс, Дебиси, Прокофјев и Шуман – и го донесоа со извонредна музичка сигурност и убедливост. Особено внимание привлече Антонио Илиоски, млад виолончелист со впечатлива техника, силно сценско присуство и интерпретативна зрелост што далеку ги надминува неговите години. Концертот беше едно од оние фестивалски откритија што најавуваат уметник од кого допрва многу ќе се слуша.
Една од најубавите слики на годинашниот фестивал дојде од летната сцена „Лепеза“ во Градскиот парк, каде што настапи младата скопска група „Фреквенција“, составена од ученици од основно училиште. Нивниот настап внесе поинаква енергија во фестивалот и покажа колку е важно да добијат простор и оние што се на самиот почеток од својот музички пат.
– Ова издание на фестивалот можеби најдобро покажа што сакаме да биде „Скопскиот градски фестивал“ – место каде што не се носат само готови концертни програми туку се создаваат нови музички средби и соработки. Особено нè радува што видовме извонредни музичари од различни генерации и од шест земји на иста фестивалска сцена, а публиката со еднакво внимание ги следеше многу различните концертни програми – велат од „Баги комуникации“.
По концертните вечери, кои секоја на свој начин го обележаа годинашното издание, в петок фестивалот ќе го заокружи Васко Атанасовски, еден од најпрепознатливите современи словенечки саксофонисти и композитори.
Во Скопје, Атанасовски ќе настапи со „Полифонија“, кој го сочинуваат врвните македонски музичари Сања Шуплевска – виолина, Гоце Вангеловски – виолина, Кристина Стојановска – виола, Александра Јаневска – виолончело и Гоце Маротов – контрабас. Атанасовски зад себе има богата меѓународна концертна и дискографска кариера и препознатлив авторски јазик во кој се среќаваат џезот, импровизацијата и музичките традиции на Балканот. Со Полифонија ќе изведе свои авторски композиции и музика инспирирана од балканското музичко наследство, во концертот со кој ќе биде затворено седмото издание на „Скопскиот градски фестивал“.
