Со присуство на министерот за информатички технологии, Дамјан Манчевски и со штанд на неколку компании, и Македонија учествува на 83-от Меѓународен саем во Солун.
Според дописничката на МИА од Атина, министерот Манчевски денес во рамки на саемот ќе има работен ручек со неговиот грчки колега Никос Папас, како и средби со претставници на грчки и американски компании.
Во текот на следната седмица, на саемот ќе присуствува и министерката за странски инвестиции Зорица Апостолска.
Македонија и оваа година со штанд, на кој излагаат неколку компании, е меѓу 20-те земји учеснички на саемот.
Според најавите, годинашниот Меѓународен саем во Солун ќе трае до 16 септември, а се очекува да биде најголем до сега, со 1.500 штандови од 20 земји.
Процените, пак, се дека ќе го посетат над 290 илјади посетители.
