Научниците од Државниот универзитет во Тјумен, заедно со колегите од другите руски научноистражувачки институти, први во светот пронајдоа универзален природен антибиотик што ја надминува отпорноста на патогените на лековите. Пронајдената супстанција ќе помогне во ефикасна борба против повеќето заразни болести на луѓето и животните предизвикани од бактерии и габи, пишуваат авторите на откритието во истражувањето објавено во списанието „Применета биохемија и микробиологија“.
Според истражувачите, една од задачите на денешната фармакологија е да бара природни антибиотици што ќе можат да се борат против микроорганизмите со отпорност на повеќе лекови (МДР) или апсолутна отпорност (екстремна отпорност на лекови, ИксДР) на антибиотиците достапни на пазарот.
Научниците покажале единствена способност на пептидот емерицилипсин А, кој е изолиран од алкалофилна мицелијална габа емерицелопсис алкалина. Според нив, супстанцијата ја инхибира способноста на бактериите да создаваат биофилмови, поради што исчезнува отпорноста на овие патогени на антибиотици.
– Емерицилипсин А дејствува на еукариотите и прокариотите со различни молекуларни механизми. Еукариотите – габи и туморски клетки – умираат поради уништување на нивната клеточна мембрана од пептидот, а вируленцијата на прокариотите се потиснува со спречување формирање биофилм – објаснува Евгениј Рогозин, виш научен соработник во лабораторијата за антимикробна резистенција на универзитетот „Икс-БИО“ во Тјумен.
Авторите на студијата истакнуваат дека емерицилипсин А ќе помогне во борбата против патологиите како што се тумори, како и сите видови бактериски и габични инфекции. Емерицилипсин А е перспективен и како независен терапевтски агенс и како елемент на комплексни препарати. Терапијата може да се изврши или со инјекција или со локален директен третман на засегнатото ткиво. Во иднина, научниот тим има намера да премине од работа со модели на клетки на лабораториско испитување лекови.
