Осум часа сон не секогаш значат дека наутро ќе се разбудите одморени. Постојаниот умор може да има многу причини, а некои од нив се кријат во секојдневни навики на кои ретко обрнуваме внимание, пишува Гардијан (The Guardian).
Една од нив е недостигот од дневна светлина. Изложувањето на природна светлина, особено во првиот дел од денот, му помага на организмот да го регулира внатрешниот часовник. Ако поголемиот дел од денот го поминуваме во затворен простор, ритамот на спиење и будност може да се наруши, што подоцна се чувствува како поспаност и недостаток на енергија.
Причина може да биде и воздухот во спалната соба. Според експертите со кои разговарал Гардијан, во лошо проветрени простории во текот на ноќта може да се натрупа јаглерод диоксид, што може да влијае врз квалитетот на сонот. Едноставно проветрување на собата пред спиење или оставање можност за циркулација на воздухот може да помогне.
И начинот на исхрана игра улога. Тешките оброци доцна навечер можат да го нарушат сонот, а исхрана сиромашна со растителни влакна и разновидна храна може индиректно да влијае врз чувството на енергија. Во текстот се посочува и нешто што често го занемаруваме – менталниот одмор. Ако мозокот постојано обработува обврски, пораки и грижи, осум часа поминати во кревет не мора да значат и вистинско закрепнување.
Сепак, постојаниот замор не треба секогаш да се припишува на начинот на живот. Мејо клиник (Mayo Clinic) наведува дека причината може да биде и анемија, нарушување на функцијата на тироидната жлезда, дијабетес, нарушување на спиењето или друга здравствена состојба. Ако уморот трае подолго, се влошува или не исчезнува и покрај доволно сон и одмор, причината треба да се провери со лекар.
