Студеното време може да влијае на нашето здравје на многу начини, а некои од нив се зголемена кашлица и настинка. Другите несакани ефекти од студеното време може да бидат повеќе изненадувачки, а вклучуваат болки во грбот, па дури и зголемен ризик од срцев удар и мозочен удар. Издвојуваме неколку неочекувани начини на кои студеното време може да влијае на нашето тело.
Смрзнатини
Според центрите за контрола и превенција од болести, студот најчесто ги погодува носот, ушите, образите, брадата, прстите на рацете или на нозете. Смрзнатините се третираат како повреда на телото предизвикана од смрзнување. Симптомите обично започнуваат со чувство на студ и болка во погодените делови, заедно со пецкање, пулсирање или болка. Оваа фаза е позната како фаза на смрзнатини, каде што кожата станува вкочанета и бела. Долготрајната изложеност на студ предизвикува оштетување на ткивото. Погодената област може да биде тврда и замрзната, но кога ќе се одмрзне ќе стане црвена и ќе се појават плускавци. Тие се нарекуваат површни смрзнатини, бидејќи ги зафаќаат горните слоеви на кожата и ткивото. Потребен е третман, но тој не е толку сериозен како длабоките смрзнатини, кои можат да предизвикаат оштетување на тетивите, мускулите, нервите и коските под кожата.
Згрутчување на крвта
Сите здравствени проблеми поврзани со настинката не се предизвикани од изложеноста на ниски температури, важна е и температурата во вашиот дом бидејќи надвор станува постудено. Агенцијата за здравствена безбедност на Велика Британија соопшти дека нашето тело води постојана битка да ја одржува нашата основна температура на околу 37,5 степени, а клетките и органите се заштитени од оштетување.
Оттаму додаваат дека кога ќе почнеме да се ладиме, крвта ни станува погуста, што може да доведе до згрутчување и стврднување на крвта. Згрутчувањето на крвта може да биде сериозно ако не се лекува, што доведува до опасни здравствени настани како мозочен удар и срцев удар.
Проблеми со дишењето
Многумина од нас ги држат прозорците добро затворени во текот на денот за да го задржат студениот воздух. Можеби мислите дека ноќта е добро време да го отворите прозорецот и да ја проветрите собата, бидејќи сте стуткани под покривката. Но Метеоролошкиот завод предупреди дека е важно да ја одржувате вашата куќа топла, а прозорецот од спалната соба затворен во студените зимски ноќи.
– Вдишувањето ладен воздух може да биде лошо за вашето здравје бидејќи го зголемува ризикот од инфекции на градниот кош – се наведува во извештајот.
Ладниот воздух може да предизвика стеснување на вашите дишни патишта, зголемувајќи го количеството слуз што го произведувате и ви го отежнува дишењето.
– Студениот сув воздух исто така може да ги иритира вашите дишни патишта и да ги влоши симптомите како што се зарипнатост, кашлање и отежнато дишење – се додава во извештајот.
Ослабен имунитет
Студот може да влијае и на способноста на вашето тело да се бори против инфекциите, велат од УКХСА.
– Затоа гледаме повеќе смртни случаи од инфекции како пневмонија во неделите по студеното време, а состојбите на белите дробови и кашлицата може да прераснат во посериозни проблеми – објаснуваат оттаму.
Ладниот воздух може да ја отежне борбата против респираторните инфекции како настинка и грип, а исто така и начинот на кој се заштитуваме од постудено време може да нѐ стави во ризик. Поминувањето повеќе време во затворен простор всушност може да помогне во ширењето на респираторните инфекции.
Болка во грбот
Ако чувствувате дека болката во долниот дел на грбот се влошува кога надвор е ладно, тоа не е нешто што ви се причинува.
– Болката во грбот всушност може да биде поврзана со барометрискиот притисок и надворешната температура. Промените во притисокот понекогаш може да предизвикаат болка во артритичните зглобови, вклучувајќи го и ‘рбетот – велат од компанијата „Џон Хопкинс медисин“.
Тие додаваат дека нашите зглобови реагираат на околината, а студот ги прави покрути и со поголема веројатност да се повредат.
