- Со впечатлива перформативна изложба, мултидисциплинарниот уметник Драган Божино ја постави темата за загадениот воздух во центарот на сцената
Драган Божино повторно ја покажа силата на својот авторски израз, претставувајќи ја „Асфиксија“ во нова перформативна форма.
Во Музејот на македонската борба во Скопје, неговите дела станаа дел од сценско доживување во кое ликовната уметност, музиката и моделингот раскажуваа една заедничка приказна – за воздухот што го дишеме и за трагата што тој ја остава врз нас.
Божино настапи како специјален гостин и со својот перформанс го затвори полуфиналниот настан на „Топ модел Јурп 2026“. За оваа пригода, тој ја претстави „Асфиксија“ како авторски перформанс, отворајќи ново поглавје во проектот „Асфиксија“.
Првпат претставена во 2023 година, „Асфиксија“ се препознава по својата несекојдневна основа: 33 слики создадени со вистински ПМ10-честички собрани од загадениот воздух во Скопје. Во овие дела, загадувањето има сопствена материјална трага. Она што секојдневно го вдишуваме, често без да го забележиме, се наоѓа пред нас – видливо на површината на сликите.
Овој пат, делата ја напуштија статичноста на класичното изложување. Носени од моделите, тие се движеа низ просторот, создавајќи жива композиција во која телото, сликата и звукот беа меѓусебно поврзани. Музиката го водеше ритамот на перформансот, а движењата и сценското присуство на моделите ѝ дадоа нова димензија на визуелната приказна.
Зад впечатливиот сценски израз стои јасна цел: да се поттикне свеста за загадениот воздух и да се отвори разговор за она на што опасно се навикнуваме. „Асфиксија“ нè соочува со загадувањето преку неговото вистинско присуство и го поставува прашањето што лесно го потиснуваме во секојдневието: што навистина внесуваме во себе со секој здив?
