Во едно необично истражување научниците Џан-Фенг Маи и Ран-Киу Јанг од кинескиот универзитет „Тијанџин“ предлагаат многу неконвенционален извор на енергија: исконски црни дупки. За разлика од општопознатите црни дупки со ѕвездена маса, овие мали ентитети, теоретски формирани од прекумерна густина во исконската плазма по големата експлозија, би можеле да бидат клучни за енергетските потреби на нашиот свет.
Земајќи го предвид фактот дека црната дупка има исклучително силна гравитациска сила, се поставува интересно прашање: гледајќи барем теоретски, дали можеме да ја искористиме гравитациската сила на црните дупки за производство на електрична енергија, т.е. да ги користиме црните дупки како батерии, наведуваат Маи и Јанг во нивната студија. Тие сугерираат на потенцијалната употреба на црната дупка Шварцшилд (црна дупка што нема ниту електричен полнеж ниту аголен момент) како батерија што може да се полни.
Иако можеби звучи како научна фантастика, кинеските научници ја истражуваат физиката зад нивниот предлог. Сепак, тие исто така го признаваат предизвикот во форма на Хокинговото зрачење, емитирано од мали црни дупки. И покрај таа пречка, нивните пресметки откриваат дека таква црна дупка во одреден опсег на маса може да се наполни за да произведе електрична енергија, со максимална стапка на ефикасност од 25 проценти, пишува „Сајенс алерт“.
Маи и Јанг објаснуваат дека во близината на исконска црна дупка, 25 проценти од масата на алфа-честичката произведена со радиоактивно распаѓање може да се претворат во кинетичка енергија што е еднаква на ефикасноста на таквите црни дупки со онаа на нуклеарниот реактор. Нивното истражување е прифатено за објавување во списанието „Физикал ревју Д“ и сега е јавно достапно на складиштето за претпечатење „Архив“ (arXiv).
Иако тестирањето на нивниот концепт останува непрактично и моментално надвор од нашиот технолошки дофат, кинеските научници предлагаат примамлива идеја – дека минијатурните црни дупки би можеле да постојат во опсегот на масата предложен за темната материја. Доколку се потврди, тоа ја отвора вратата за интригантното сценарио за користење на една од најзагадочните форми на материја во универзумот за напојување на секојдневните уреди.
