Неодамнешните истражувања сугерираат дека интензивното вежбање може да го загрози имунолошкиот систем. Тоа откритие е засновано на студија што опфати повеќе од 4.700 молекули од телесните течности на пожарникарите по вежбање. Резултатите се загрижувачки за поединци со физички тешки работни места за кои е потребен интензивен фитнес-тренинг, како што се работниците за итни случаи и спортистите.
Биомедицинскиот научник од Пацифичката северозападна национална лабораторија, Ернесто Накајасу, ја нагласува потенцијалната ранливост на луѓето, кои инаку би се сметале во добра форма.
– Луѓето што се во добра форма може да бидат повеќе склони кон вирусна респираторна инфекција веднаш по интензивно вежбање. Тоа сугерира дека намалената воспалителна активност може да придонесе за споменатата чувствителност – истакнува Накајасу.
Иако е општо прифатено дека умерената физичка активност има корист за имунолошкиот систем на долг рок, моменталниот ефект на енергичното вежбање врз имунитетот останува контроверзен. И покрај ограничените сигурни докази, кои го поврзуваат енергичното вежбање со опортунистички инфекции, некои студии пријавиле инфекции на горниот респираторен тракт кај спортистите по напорна активност, пишува „Сајенс алерт“.
За да го истражат ова дополнително, Накајасу и колегите ги испитувале крвната плазма, урината и плунката на 11 пожарникари пред и по 45 минути интензивно вежбање. Научниците имаа цел да откријат рани знаци на опасност поврзани со исцрпеност и потенцијално да го намалат ризикот за првите лица што реагираат, спортистите и воениот персонал. Нивното истражување беше објавено во списанието „Милитри медикал рисрч“.
Студијата ги разгледа физичките промени кај пожарникарите, вклучувајќи и зголемување на опиорфинот, дилататор на периферните крвни садови, како и намалување на воспалителните молекули. Научниците шпекулираат дека овие промени може да ги подобрат протокот на крв и размената на гасови како одговор на зголемената клеточна побарувачка за кислород за време на вежбањето.
Оралниот микробиом на учесниците исто така покажа промени, со зголемување на антимикробните пептиди. Меѓутоа ова не го инхибираше растот на ешерихија коли, што укажува на ограничен капацитет на антимикробни пептиди во усната шуплина за заштита од инфекција.
Додека некои тврдат дека забележаните промени може да укажуваат на зголемена состојба на имунолошкиот надзор и имунолошка регулација, студијата ја потврдува уникатната изложеност на загадувачи за време на шумски пожари, што може да влијае на имунолошките реакции. Покрај тоа, студијата се фокусираше на здрави активни мажи, нагласувајќи ја потребата од поголеми студии засновани на заедницата за да се потврдат овие резултати.
