Појавата на град ќе предизвикува огромни економски штети низ Европа, а климатските експерти предупредуваат дека може да стане уште поразорен поради глобалното затоплување. Новото истражување покажува дека до крајот на векот значително ќе се зголеми паѓањето град, што може да предизвика сериозни оштетувања на возилата, покривите, соларните централи и друга инфраструктура.
Научниците предупредуваат дека климатските промени, поттикнати од согорувањето на фосилните горива, создаваат сè понестабилни атмосферски услови погодни за развој на силни бури и град. Според резултатите од истражувањето, појавата на крупен град може да се зголеми меѓу 38 и 47 отсто до крајот на векот, во зависност од количеството на стакленички гасови што човештвото продолжува да ги испушта во атмосферата.
Коавторот на студијата Џон Ален, професор по метеорологија на Американскиот универзитет во Централен Мичиген, вели дека глобалната штета што ја предизвикува градот се проценува на околу 80 милијарди долари годишно. Европа е особено погодена. Според податоците на осигурителната групација „Чосер“, бројот на невремиња со град во Европа е зголемен дури за 267 отсто во последните пет години, при што во текот на 2019 и 2020 година се забележани 3.217 бури. Ален предупредува дека градот денес предизвикува поголема материјална штета отколку торнадата и дека глобалните трошоци ја надминуваат штетата предизвикана од неколку урагани годишно.
