Националната галерија на Австралија ќе врати три бронзени скулптури во Камбоџа откако беше откриено дека се украдени, пренесува „Би-би-си“.
Овој потег на Австралија доаѓа по десетгодишна истрага на двете земји за да се утврди потеклото на скулптурите, кои датираат од 9 и 10 век. Владата на Камбоџа го поздрави историскиот потег и го смета за важен чекор кон исправување на неправдите од минатото.
Трите статуи потекнуваат од Кралството Шампа, кое некогаш постоело во Виетнам и делови од Камбоџа. Националната галерија на Австралија (НГА) тврди дека ги купила скулптурите во 2011 година за 1,5 милион долари од британскиот шверцер на артефакти Даглас Лачфорд, кој почина во 2020 година. Тој беше вмешан во нелегална трговија со антиквитети од 2016 година, а обвиненијата за 2019 година се поврзани со шверц на украдени и ограбени камбоџански артефакти.
Трите статуи беа откопани во Тбунг Кмум во источна Камбоџа во 1994 година, пред да бидат прошверцувани од меѓународните трговци со уметнички дела преку границата во Тајланд и да завршат во колекцијата на Лачфорд.
Неговата ќерка Нвапан Криангсак соработувала со истражителите од НГА и Министерството за култура и уметност на Камбоџа за враќање на скулптурите. Тие ќе останат во галеријата во Канбера три години додека Камбоџа не им подготви „нов дом“ во Пном Пен.
Камбоџа продолжува да ги повикува меѓународните влади да вратат илјадници антиквитети што биле украдени од нејзините древни храмови.
Ова е вторпат НГА да враќа украдена уметност од својата колекција. Во 2021 година голем број артефакти беа вратени во Индија, некои датираат од 11 век и се поврзани со шверцерот Субхаш Капур и покојниот њујоршки дилер на уметнички дела Вилијам Волф.
Во март беше објавено дека четирите копја од Абориџините, земени од британскиот истражувач капетан Џејмс Кук по неговото пристигнување во Австралија во 1770 година, ќе им бидат вратени на нивните сопственици.
