Самит на ЕФА во Жирона, Шпанија
Директорката на НУ „Охридско лето“, Наташа Поповиќ, изминативе денови ги презентираше успесите на фестивалот „Охридско лето“ на Самитот на уметнички фестивали во Жирона, Шпанија, во чии рамки се одржа и 70. Генерално собрание на Европската фестивалска асоцијација (ЕФА). Поповиќ, која пред две години ја доби титулата почесна делегатка на ЕФА, рече дека членството во оваа елитна асоцијација е доказ дека фестивалот „Охридско лето“ е на вистинскиот пат во својата меѓународна афирмација, а потврда за тоа е високата оцена од асоцијацијата, со која „Охридско лето“ се искачи на високото петтото место меѓу 140 фестивали-членки на ЕФА.
– Културата, уметноста и традицијата го опишуваат кодот на секој народ и зборуваат за неговото постоење низ вековите, неговата посебност и специфичност. Токму „Охридско лето“ е кодот на културата на Балканот, најголемиот промотор на соработка на новата визија на иницијативата Отворен Балкан, што отвора нова култура. Фестивалот „Охридско лето“ е специфичен и посебен, препознатлив и единствен на нашите простори, како еден од најистакнатите културни настани во Европа и светот, фестивал со вековна отвореност кон културите, создавајќи духовна интеракција во размената на светските добра. Повеќе од половина век фестивалот „Охридско лето“ претставува најголемата културна музичко-сценска манифестација, препознатлива не само кај нас туку и во светски рамки, цврсто чекорејќи кон остварување на мисијата – културна Европа со заеднички врвни културни вредности – рече Поповиќ.
Пред првите луѓе на ЕФА и над 300 делегати и претставници на најдобрите европски фестивали, Поповиќ зборуваше и за богатата фестивалска историја на „Охридско лето“ во градот што е духовен центар на македонската култура.
– Долгогодишното опстојување на оваа манифестација упатува на една голема традиција, која извира од градот Охрид, духовната престолнина на државата и важи за столб на македонската култура и стожер на нашата традиција – истакна таа во своето обраќање.
На четиридневниот собир во Жирона и Паралада, Поповиќ оствари и голем број средби на кои беше истакната улогата на уметноста, фестивалите и фестивалските чинители во општеството. Според неа, ЕФА е местото од каде што се промовира врвната уметност, се негува традицијата, се градат мостови помеѓу културите на различните народи и се создава визија за иднината на светската уметничка сцена. Асоцијацијата ЕФА вклучува над сто фестивали од 40 земји. Фестивалот „Охридско лето“ од 1994 година е значаен партнер на асоцијацијата. На минатогодишното фестивалско издание високи претставници на Европската асоцијација на фестивали предводени од претседателот Јан Бриерс беа дел од свеченото отворање на фестивалот со четирите врвни италијански тенори: Алесандро Косентино де Акриса, Федерико Сера, Џовани Мариа Палмиа и Уго Тарквини.
В.Д.
